Ауырған науқастардың басым бөлігі – балалар. Бастапқы белгілері аса қауіпті болып көрінбегенімен уақытылы ем қабылдамаса ас­қынып, адам өміріне қауіп төн­діреді. Алғашында құрғақ жөтел­ден басталып, ол уақыт өте келе күшейіп, қызуы заматында қатты көтеріледі. Вирус жөнінде Сырдария аудандық ауруханасының «Жұқпалы аурулар бөлімшесінің» дәрігері Мереке Ізтаева айтып өтті.

– Қазіргі таңда «ЖРВИ» диагнозымен ауруханаға түскен науқастар қатары азаймай тұр. «Жұқпалы аурулар бөлімшесі» бір мезгілде 18 науқасты қабылдауға да­йын. Қаңтар айының басынан бері тұмау белгілерімен 40-қа жуық науқас түсті. Оның 30-дан аста­мы – балалар. Бөлімшеге күніне 5-10 емделушіге дейін түседі. Жалпы, бұл аурудың белгілері құрғақ жөтелден басталып, қызуы 38-39 градусқа дейін көтеріледі. Дер кезінде ем қабылдамаса, отит, пнев­мония секілді асқынуларға әке­ліп соқтырады. Үй жағдайында емделемін десеңіз, міндетті түрде дәрі­герге қаралып, тағайындалған ем-шараны уақытылы қабылдап отыру маңызды. Өйткені, кей жағ­дайда жөтел кетпей, созылмалы бронхитке айналуы мүмкін. Бала­лардың арасында тараған бұл вирус тез жұғады. Сондықтан бас­ты талап бетпердені пайдалану керек. Қоғамдық ортаға, адам көп шоғыр­ланатын жерге шыға бермеу де орынды. Бүгінде бөлімшеде орын толық. Науқастар арасында ауруы асқынғандар жоқ. Күнделікті емі уақы­тылы жүргізіліп отыр, – деді дәрігер.

Ауру жас талғамайды. Жаңа туған нәрестеге дейін жұқпалы дертті жұқтырған жағдайда, инфекцияны жеңіп шығады. Инфекция – иммунитеті дұрыс қалыптаспаған бүлдіршіндер үшін бұл едәуір соқ­қы. Себебі бала денесінде антидене дамып үлгермеген. Дамымаған жағдайда инфекциямен күресуге бала қауқарсыз. Бұл ретте «Ауы­рып ем іздегенше, ауырмайтын жол ізде» деген сөздің жаны бар екенін ұғасыз. Отбасында балаңыз немесе үлкен қарт кісілерден тұмаудың, жөтелдің бір белгісін байқасаңыз, дер кезінде қолға алып, дәрігердің кеңесіне жүгінген абзал. Үй жағдайында құрғақ жө­тел болса, жылы суды көп беріп, құрамында қанты бар тағамды азайтқан дұрыс. Дәрігердің жазып берген дәрі-дәрмегін уақытылы беріп, қызуын 2-3 сағат сайын өлшеп отыру қажет. Сондай-ақ денеде антидене қалыптастыратын дәрумендерге толы жемістер мен көкөністерді көптеп жеу маңызды. Ал ауру біртіндеп күшейгенін бай­қасаңыз, бірден жедел жәрдемді шақырып, ем алған дұрыс. Әр аурудың белгісіне мән беріңіз. Ерте­рек қолға алған жағдайда ешқандай асқыну болмайтыны анық. Бұл тек жұқпалы ауруларға байланысты емес. Кей аурудың түрлері ешқандай белгісіз өтеді. Оны да ескеріп, айы­на немесе 6 айда бір тексерістен өтіп тұру артықтық етпейді. Өз ден­саулығыңыз бен балаңыздың ден­саулығы өз қолыңызда. Уақы­тылы қаралып, ағзаға қажетті дәру­мендерді толықтырып отыру маңызды. Сонымен қатар вирусқа қарсы вакцинаның да маңызы зор. Оны салдырған жағдайда жұқпалы аурумен ауырсаңыз, антидене қа­лып­тасып, жеңіл өтеді. Отбасыда бір адам ауырса, артынша барлығы кезегімен жұқтыруы мүмкін. Оны да ескеріп, барынша сақтанған жөн.