22 жасар Ақбаян – Тараз қала­сының тумасы. Отбасының қоныс аударуына байланысты Сыр еліне аяқ басып, Жетікөл ауылына тұрақтаған. Қызылорда қаласында орналасқан медициналық колледжде білім алып, фельдшер маманы болып шығады. Өмірлік жолдасы Айбекпен танысып, 2021 жылы шаңырақ көтерген. Екі қызды тәрбиелеп отырған жас отбасы бүгінде сол Жетікөл ауылында тұрады.

– Негізі өзімнің әпкем қайтарымсыз грантқа қатысып, ұсақ мал шаруа­шылығын дамыту мақсатында мем­лекеттің қолдауына ие болған еді. Ол кезде сүт бағытында ешкі баққан болатынбыз. Уақыт өте келе, тұрмысқа шыққаннан кейін жолдасым Айбекпен ақылдасып, бордақы мақсатында баспақ алып, бағып көрейік деп шештік. Мемлекет басшысының бас­тамасымен жүзеге асып жатқан бағ­дарламалардың біріне биыл қатысып, бизнес жоспар өткізіп, қорғап, 1 572 800 теңге көлемінде қайтарымсыз грант алдық. Оған 6 баспақ алып, қазіргі уақытта үшінші айға кетіп бара жатыр, бордақылап жатқанымызға. Тек ет бағытындағы кәсіпті алғаш рет жүргізіп жатқаннан кейін қорқыныш бар. Бірақ осы бастамадан жақсы нәтиже шығару керек. Әрі қарай да тоқтап қалмай, үздіксіз жалғастырамыз деп жоспарлап отырмыз. Жолдасымның жұмысы шекарада болғандықтан көбіне үйде бола бер­мейді. Баспақтарға өзім және қайын атам көмектесіп, жайғаймыз. Оның қосымша жем-шөбі бар. Уақытында мөлшерімен берілмесе, осыған де­йін­гі төккен еңбегіміз зая кетеді. Сон­дықтан күндегісін күнде үзбей, мөлшерін сақтап беру керек. Алдағы жылдан бастап кеңейтіп, қолға алу жағын қарастырып жатырмыз, – дейді жас кәсіпкер Ақбаян Мұратқызы.

Түрлі бағытта, түрлі салада қолдау өте маңызды. Шағын кәсіпкерлікті дамыту және оны әрі қарай жандандыру мақсатында жүзеге асып жат­қан мемлекеттік бағдарламаларды тиімді пайдалану керек. Халыққа қажетті кез келген нәрсені кәсіпке айналдыруға болады. Тек ұтымды әрі ерекше бизнес жоспар әзірлеу де – шеберлік. Сондықтан мұндай мемлекеттен берілетін субсидияны жауапкершілікпен жүзеге асырып, әрі қарай дамыта білу керек.

Қазіргі уақытта мал шаруашы­лығы­мен айналысатын жастар қатары бірте-бірте артып келеді. Бұл – шағын кәсіпкерліктің еліміз бойынша дамып келе жатқандығының көрінісі. Соның бірі нәзік жан иесі – Ақбаян Отаралы. Бар-жоғы 22 жаста болса да кәсіпкерлікке ден қойып, мал шаруашылығын бордақы бағытында дөңгелентуде. Оған қолдау білдіріп, бастаманың дамуына үлес қосып жүрген жолдасы мен қайын атасы да түсінігі мол жандар. Алдағы уақытта баспақ санын арттырып, бордақы бағытын бірыңғай жолға қоюды жос­парлап отырған жас кәсіпкерге тек сәттілік демекпіз.