Өткен аптада аудандық мәдениет және тілдерді дамыту бөлімінің, Қоғалыкөл ауылдық округі әкімдігінің қолдауымен, ауылдық клубтың ұйым­дастыруымен су­ретші, карикатурашы Қожахмет Қоңырқожаұлының туғанына 115 жыл толуына орай «Көңілдің қоңыр күмбірі» атты облыстық жас суретшілер байқауы өтті.

Балалар арасында ұйымдас­тыр­ыл­ған байқауды Сырдария ауда­нының Құрметті азаматы Қамар Рүстемов, ауылдық ардагерлер кеңесінің төра­ғасы Сламбек Каюпов және ауыл әкімі Бақытжан Жұмабекұлы ашып беріп, қатысушыларға сәттілік тіледі.

Жас суретшілер байқауына облыс орталығы мен аудандардан келген 11 талапкер қатысты. Суретшілердің жас ерекшелігі 12-16 жас аралығы деп белгіленді. Байқау екі кезеңнен тұрды. Алғашқы кезең «үй тапсырмасы» деп аталып, онда әр үміткер туған өлкесінің көрікті жерін А3 форматтағы қағазға салып, алдын ала дайындап әкелді. Суретшілер өз қиялына ерік бере отырып, туған өлкенің әсем, көркем жерлерін қағаз бетіне түсіріпті. Суреттер бейне бір сөзсіз сөйлеп тұрғандай көрініп, бейнелеу өнерінің тылсымдарына бой алдырып тұрды.

Ал екінші кезеңде талапкерлер суретші Қожахмет Қожықовтың бір туындысын таңдап, оны өз қол­таңбасымен қайта бейнелеп шықты. Бұл кезеңде қатысушыларға дара тұлғаның туындысын заманауи стиль­де жаңартуға рұқсат берілді. Аталған кезеңде жас суретшілер өз қиялдарына ерік бере отырып, қазылар алқасының көз алдында сурет салып шықты.

Байқауға қолөнер шебері, ҚР Су­рет­шілер одағының мүшесі Жәнібек Маханбет, темір ұстасы Талғат Ыдырысов, №44 орта мектептің бейнелеу пәні мұғалімі Жанкерім Қосжанова төрелік етті.

Қазылар алқасының шешімімен бас жүлдені Шиелі ауданынан келген Айбын Маханбет, І орынды Арал ауданынан келген Сезім Жақсылық жеңіп алды. ІІ орын Қазалы ауданының қатысушысы Ақтоты Кеңесбайға, ІІІ орын Қызылорда қаласының талапкері Бекарыс Сәдібеков пен жаңақорғандық Ықтияр Байділдаға бұйырды. Сонымен қатар барлық қатысушыға арнайы Алғыс хат табысталды. Айта кетейік, байқау барысында клуб жанынан құрылған үйірме мүшелері ән мен биден шашу шашты.

Қожахмет Қожықов – қазақ мем­лекеттілігін жаңғыртуды көздеген ұлт қайраткерлерінің алғашқы легінде күрескен белгілі тұлға Қоңырқожа Қожықовтың ұлы. Ал анасы Ләтипа Қожықова – костюмер. 1926-1928 жылы Мәскеудегі мемлекеттік жо­ғары көркемөнер техникалық шебер­ханасында оқыған. Оның «Егін орағы», «Газет оқу» атты ұжымшар тыныс-тіршілігін көрсететін туын­дылары, «Алқызыл моншақты келін­шек», «Ақын толғанысы» (Жамбыл бейнесі) атты картиналары ұлттық бейнелеу өнерінің алғашқы қарлығаштары саналады. Ол Қазақ мемлекеттік драма және опера театр­лары спектакльдерінің алғашқы суретші-безендірушісі болған. 1938 жылы қуғынға ұшырап, ұзақ жыл лагерь азабын тартқан. Айдаудан оралған соң, шығармашылық және ұстаз­дық жұмыстармен айналысқан. 1944-1953 жылы «Қазақфильм» кино­­студия­сының декораторы бол­ған. Қожахмет Қоңырқожаұлы – тек суретші ғана емес, қазақтың рухани әлемін көркемдікпен кестелеген шынайы өнер жанашыры. Оның әр еңбегі – елдің тарихы, халықтың болмысы, ұлттық үннің бояумен өрілген шежіресі.