Сонымен қатар «Ауылдық аймақтарды дамыту­дағы азаматтық қоғамның рөлі» атты азаматтық форум өз жұмысын бастап, күні бойы сарапшылар мен сала мамандары, құрметті қонақтар өзекті мәсе­лелерді талқылады. Расында, аймағымызда бір күнде қос форумның өтуі – үлкен мәртебе. Ең алдымен, Әдеп жөніндегі уәкілдердің республикалық форумында мемлекеттік қызметшілердің қоғам өмі­ріндегі рөлі айшықталып, қызметтік бағыты, заң аясында атқарылатын жұмыстар легі нақтыланды. Форумда ҚР Мемлекеттік қызмет істері агенттігінің төрағасы Дархан Жазықбай мемлекетке қызмет ету – ең құрметті әрі аса жауапты міндет екенін айтып, маңызды бастамаларға тоқталды. Өз кезегінде Наурызбай Байқадамов «Мемлекеттік қызметшілерді адамдардың құқыққа қайшы әрекеттерінен қорғау», Азамат Жолманов «Мемлекеттік қызметтің құн­дылықтары: Антқа адалдық» тақырыбында баяндама жасады.

Айта кетейік, «Ауылдық аймақтарды дамытудағы азаматтық қоғамның рөлі» атты азаматтық форумының секциялық отырыстары Сырдария ау­да­нына қарасты Нағи Ілиясов және Бесарық ауы­лында жалғасын тауып, негізгі отырыстың алдында форум делегаты озық ойларды ортаға салды. Қос ауылда өткізілген отырыста ауылдың әлеуметтік мәселелерін шешу, халықтың өмір сапасын жақсарту, қоғамдық бақылауды қамта­масыз ету бағытындағы іс-шараларды іске асыру мәселелері қаралды. Расында, ел халқының басым бөлігі ауылда тұратыны жасырын емес. Мұндайда ауылды да­мытуды көздеген жобалар мен бағдарламалардың тиімділігін арттыру да назардан тыс қалмады. Төртінші деңгейлі бюджетті бақылау арқылы жұмыс жүргізу мәселесі де форумның басты тақырыбына айналды.

Облыс орталығында түйінделген форум жұмы­сында облыс әкімі сөз сөйлеп, келелі жиынның маңыздылығына тоқталды.

– Бүгінде еліміздің дамуын айқындайтын көр­сеткіштердің бірі – азаматтық сектор. Мемлекеттің табыстылығы үкіметтік емес ұйымдардың жемісті әрі тиімді қызметіне тікелей байланысты. Президентіміз Қасым-Жомарт Кемелұлы Жол­дауында «Азаматтық қоғамға қолдау көрсетіп, оның әлеуетін нығайта түсу керек. Сондай-ақ аса маңызды жалпы мем­лекеттік міндеттерді шешу үшін талқылау жұмыс­тарына азаматтық қоғамның мүмкіндіктерін кеңі­нен қолдану қажет» деп атап өткен болатын. Тәуел­сіздіктің алғашқы жылдарында аймағымызда 15 қоғамдық ұйым болса, бүгінде олардың қатары мыңға жуықтады. Оның 300-і өңіріміздің қоғамдық-саяси, мәдени-рухани өміріне белсенді ара­ласуда. Бұл қоғамда азаматтық жауап­кершілік пен белсенділіктің артқанын айқын көрсетеді. Барлық ауданда үкіметтік емес ұйымдармен өзара іс-қимыл және ынтымақтастық жөніндегі кеңестер, жүзеге асырылатын жобалардың тиімділігі мен өзек­тілігін бағалайтын сарапшылық топтар жұмыс істейді. Әкімдіктер жанындағы кеңестер мен комис­сиялардың жұмысына 190 үкіметтік емес ұйым өкілі белсенді қатысады. Жыл сайын мемлекеттік тапсырыс арқылы азаматтық қоғам институттарына қаржылай қолдау көрсетіліп келеді. 2023-2025 жылдары мемлекеттік әлеуметтік тапсырыс аясында бюджеттен 3 млрд 684 млн теңге қаражат бөлініп, 427 әлеуметтік жоба іске асырылуда, 3 мың адам жұмыспен қамтылған. Әлеуметтік жобалардың 200-ге жуығы ауыл тұрғындарының қатысуымен ұйымдастырылды. Басым бөлігі халықтың әлеуметтік осал топтарына көмек көрсетуге, қоғамдық келісімді, ұлттық бірлікті нығайтуға, халықты жұмыс­­­пен қамтуға жәрдемдесуге бағытталған. Қоғамдық қауымдастықтың көшбасшылары ретінде бәріңізді Әділетті, Таза, Қауіпсіз Қазақстанды құру жолында халықтың бірлігін арттыруға, егемен елі­міздің жарқын болашағына бірлесе қызмет етуге шақы­рамын! – деді Н.Нәлібаев.

Бұл ретте, Парламент Сенатының депутаты Наурызбай Байқадамов, Мәжіліс депутаты Мұрат Әбенов, Қазақстанның Азаматтық альянсы прези­денті Бану Нұрғазиева, Мәдениет және ақпарат министрлігінің Азаматтық қоғам істері комитеті төра­ға­сының орынбасары Жанаргүл Әлжанова, «Қазақстан халқына» қоғамдық қорының басқарма төрағасы Ләззат Шыңғысбаева, Орталық Азиядағы Еуразия қорының директоры Ринад Темірбеков, Қызылорда облыстық үкіметтік емес ұйымдардың Альянсы» заңды тұлғалар бірлестігінің төрайымы Анар Ізден баяндама жасап, іс-шараның мән-мағы­насын айшықтай түсті.