Ғылыми жоба қорғаудың тиімді жолы қарастырылды

Жаңа оқу жылы басталып, аудандағы білім ошақтарына жан бітті. Жаздағы мүлгіген тыныштықты бұзған мектеп оқушылары мақсатты түрде білім деңгейін арттыру жолында ізденіс үстіне түседі. Осы ретте ғылыми жобамен айналысып, жаңа зерттеу жұмысына көңіл бөлетін ұстаз бен шәкіртке тәжірибелі мамандардың бағыт-бағдары ауадай қажет. Жақында Иса Тоқтыбаев атындағы №35 мектеп-лицей базасында «Ғылыми-зерттеу жобасын ұйымдастырудың әдістемелік негіздері» тақырыбында арнайы іс-шара өтті.

Әдістемелік көмек пен сұрақ-жауап, пікір-таласқа негізделген іс-шараға аудандық білім бөлімінің әдіскері Мұстафа Мамытов, химия ғылымдарының кандидаты Гүлжан Балықбаева, педагогика ғылымдарының ма­гистрі Манат Парменова, Гүлфайруз Маханова, Гүлшат Оңғарбаева, география магистрі Сандуғаш Тәженова, жаратылыстану магистрі Гүлнұр Мұсағұлова шақырылды. Иса Тоқтыбаев атындағы №35 мектеп-лицейдің директоры Қалихан Омаров сөз сөйлеп, іс-шараның ма­ңыздылығына тоқталды.

– Ұстаз бен оқушыны ортақ байланыстыратын білім саласының негізгі тетігінің бірі – ғылми жоба дайындап, оны сәтті қорғау екені мәлім. Бұл тұрғыдан алғанда мектеп-лицей ұстаздарының тәжірибесі мол. Бұған дейін педагогикалық ұжым мүшелері оқушылармен бірге республикалық деңгейде жоғарғы орынға қол жеткізіп жүр. Бүгін сала мамандарымен тығыз байланыс орната білген аға оқытушылар әдістемелік көмек көрсетуге келді. Әрине білім сапасын арттыру бағытында ортақ пікір алмасып, әрбір оқытушының тәжірибесіне сүйенген абзал, – деді мектеп-лицей директоры.

Мектеп-лицей директорының бейін­ді оқы­ту жөніндегі орынбасары Жанна Сәркее­ва жыл көлемінде қорғалған жобалардың ау­қым­дылығына баса назар аударды. Жалпы білім беретін пәндер бойынша республикалық ғы­лы­ми жобалар байқауының жеңімпазы Ләйлә Сағымбаева «Кептірілген жеміс чипстері» және жас ұстаз Айгүл Сүлейменова «Русский персонаж Иван Дурак и японский персонаж Наруто: Сходства и различия» тақырыбындағы жобасын таныстырып, құрылымдық ерекшелігін, зерттелу бағытын баяндады.

– Бізге көрсетілген қос жобаның ау­қым­дылығы жоғары. Мұғалім мен оқушының жан-жақты ізденісі көрініп тұр. Авторлық құ­қықты заңдастыру мәселесі назарда болған дұрыс. Іс-тәжірибемізде өзге біреу еңбегімізді көшіріп басып, өзінен қорғаған жағдай көп­теп кездесті. Мұндайда патент алып, жоба же­текшісі өз құқығын қорғағаны дұрыс. Мектеп-лицей ұжымымен бірнеше жыл қатарынан жұмыс жасап келеміз. Үнемі әдістемелік көмек көр­сетуге дайынбыз. Жоба дайындау барысында тың тақырыпқа көңіл бөлген дұрыс. Қазіргі уақытта заманауи технология даму үстінде. Барлық мүмкіндікті қарастырып, ау­қым­ды жоба жасауға болады, – деді Гүлжан Балықбаева.

Пікірталас алаңына айналған жиында барлық аға оқытушы ғылыми жоба дайындау­да жіберілетін кемшілікті тізбектеп, бағдарлы ізденіс жолындағы ескерілетін факторды атады.

Балтабай ОРДАБЕКОВ