Айтулы мерекеде сала мамандары құрмет төрінде

Сырдария аудандық емханасының мәжіліс залында «30 тамыз – Қазақстан Республикасының Конституция күні» мерекесіне арналған салтанатты іс-шара өткізілді. Іс-шараға аудандық ауруханың бас дәрігерінің бастапқы медициналық санитариялық көмек жөніндегі орынбасары Жанар Жұмабаева, аудандық аурухана жанындағы медицина қызметкерлері кәсіподақ ұйымының төрағасы Серік Маханбетов пен мамандар қатысты.

Салтанатты іс-шараны ашқан Жанар Әшімқызы жиналған көпшілікті айтулы мерекемен құттықтады.

– Бұл атаулы күн – еліміздің Тәуелсіздігі мен бірлігінің, тұрақтылығы мен гүлденуінің негізі саналатын айрықша мемлекеттік мереке. Конституция – халықтың еркін білдіретін, құқықтары мен бостандықтарын қорғайтын басты заң. Биыл Конституцияның 30 жылдығы аталып өтілуде. Осы маңызды күні баршаңызға зор денсаулық, бейбіт өмір, татулық пен бақ-береке тілеймін. Еліміз аман, жұртымыз тыныш болсын. Мемлекетіміздің әрбір азаматы заңды құрметтеп, ел болашағына өз үлесін қоса берсін. Конституция күні құтты болсын, – деді Жанар Әшімқызы.

Мерекелік жиында Жанар Әшімқызы бірнеше сала маманын мерекелік Алғыс хат және бағалы сыйлықпен марапаттады. Шаған ауылдық дәрігерлік амбулаториясының медбикесі Сәрсенкүл Байжанованы зейнеткерлік демалысқа шығарып салып, зор ілтипат танытты. Сонымен бірге медицина қызметкерлері кәсіподақ ұйымы атынан құрмет көрсетілді.

Сырдария аудандық ауруханасы