Кеселмен күрес бәсеңдемейді
Түп-тамырымен қоғамды жайлаған жемқорлықтың алдын алу әсте оңай болмай тұр. Бүгінде қоғамның қай бұрышын да қамтыған бұл мәселенің оң шешімін табу қиын болып отыр. Жемқорларға жазаны арттырып, айыппұл мөлшерін өсіргенімізбен, жұрттың қаржысын қалтаға басатындардың саны азайған жоқ. Керісінше асқынып бара жатқандай көрінеді. Әрине бұл ретте Сыбайлас жемқорлыққа қарсы іс-қимыл агенттігінің атқарып жатқан қызметін жоққа шығаруға болмайды. Олар әшкерелеген жемқорлар қанша, әлі ашылмаған қылмыс қанша? Әлі бірталай іс тергеп-тексеріліп жатқаны, сондай-ақ беймәлім жағдайлары да бары белгілі.Президент Қасым-Жомарт Тоқаев өзінің әр Жолдауында бұл мәселеге ерекше мән береді. Сайлауалды бағдарламаларында да аталған тақырыпты жиі көтереді. Мүдделі мемлекеттік органдардың осы маңызды міндетті орындауға бағытталған жұмысының нәтижелілігі жылдан-жылға біршама арта түскені көңілге үміт ұялатады.
Сыбайлас жемқорлық-мемлекеттік құрылымдардың экономика аясында, қылмысты құрылымдармен біте қайнасуы, сондай-ақ мемлекеттегі лауазымды адамдардың, қоғамдық және саяси қайраткерлердің сатылғыштағы парақорлығы, өзінің қызметтік мәртебесі мен өкілеттіктерін жеке, топтық және өзге де бейқызметтік мүдделер үшін пайдалану жолымен жеке игіліктерді алу әрекетінен көрініс табуда.
Қазақстанда сондай-ақ сыбайлас жемқорлық үшін қылмыстық, тәртіптік, әкімшілік жауапкершілікті реттейтін арнайы нормативтік-құқықтық актілерде қабылданды. Сонымен қатар осы саладағы ынтымақтастық туралы халықаралық актілер де бар. Елімізде Сыбайлас жемқорлық азайса, Қазақстанымыздың әлеуметтік жағдайы жақсарып, өз мақсатына бір табан жақындайды.
Заңды қатайтқанмен, адамның санасы түзелмесе, ештеңе өзгермейді. Сондықтан, ең алдымен, халықтың санасын оятуға жұмыс істеу керек.
Нұғман СМАЙЛОВ,
Шаған ауылдық округінің әкімі
