Ел болашағы айқындалатын тарихи таңдау

Бүгінде еліміз саяси жаңару мен жаңғыру кезеңінен өтуде. Бұл жолда мемлекеттегі саяси жүйені түбегейлі өзгерту үшін ашықтық пен жариялылық принциптері басты орынға шықты. Со­ның айғағы ретінде Ата Заңымызға енгізілетін түзетулерге байланысты Мемлекет басшысы референдум өткізуді ұсынды. Бұл – мемлекетіміз үшін ма­ңызды қадам, мемлекеттік басқаруда ха­лықтың ықпалын арттырудағы үлкен мүмкіндік.

Жалпы Президент Қасым-Жомарт Тоқаев ұсынған референдум мемлекет пен қоғам қатынасында тиімді құқықтық негіз қалыптастыруға бастау болады. Бұл – Әділетті Қазақстан құрудың бас­тамасы. Кон­сти­туциялық реформадағы басты қағида: күшті Президент, ықпал­ды Парламент және есеп беретін Үкі­мет. Сондай-ақ Конституциялық Сот құ­ры­лып, өңірлік деңгейдегі басқару тетігі де күшейеді. Осының барлығы Консти­туцияның 33 бабына енгізілетін 56 түзе­туде қарастырылады.

Ата Заңымызға өзгерістер енгізу арқылы біз жаңа қоғам қалыптас­ты­рамыз. Өзгерістерге бет бұрып, соның нәтижесінде қоғамдық құн­дылықтарды жаңарту және ұлттың жаңа сапасын жетілдіруге атсалысамыз. Мемлекеттік маңызы бар істе халықтың мүддесі ал­дыңғы орында тұрады. Әрине бұл бір сәтте немесе бір күнде атқарылатын іс емес. Біз қоғамды қайта құрудың терең және ұзақ процесіне бірте-бірте келе жатырмыз. Сол себепті Ел Президенті айтқан Жаңа Қазақстан – қоғам мен ұлттың жаңаруы, ал Екінші Республика – мемлекеттік модельдің жаңаруы екенін түсініп, оны жүзеге асыруға әрбіріміз атсалысуымыз керек.

Ел тұрғындары өсіп-өркендеген, заң үстемдік ететін, тең құқылы, ашық қо­ғам­да өмір сүруді қалайтыны айқын. Осы жолда халықтың бел­сенділігі әсте қажет. Сондықтан ел тағдырын айқындайтын осынау маңызды кезеңде шет қалмай, ортақ мүдде жолында тарихи таң­дау жасауға бір кісідей жұмылуымыз керек. Жаңа қоғам, біз қалаған өзгерістер жарқын болашағымыздың айқын көрінісі болмақ.

Бауыржан ӘЛИЕВ,
Н.Ілиясов ауылы әкімі аппаратының
әлеуметтік қызметкері