Қазақстанда зейнетақы мен жәрдемақы өседі
Инфляция дәлізінің өзгеруіне байланысты зейнетақы мен жәрдемақы тағы индексацияланады. Нақтыланған бюджетте оған 111 миллиард теңге қарастырылған. Бұл туралы премьер-министрдің орынбасары Ералы Тоғжанов мәлімдеді, деп хабарлайды Stan.kz ақпарат агенттігі.
Ол күні кеше үкімет маңызды шешім қабылдағанын еске салды.
"Инфляция дәлізінің 8-10%-ке дейін өзгеруіне байланысты зейнетақы мен жәрдемақы мөлшерін қосымша тағы 4%-ке индексациялау жоспарланып отыр. Бұл жиынтық мәнде барлық әлеуметтік төлемнің 9%-ке, ал ынтымақты зейнетақының 2021 жылға қарағанда 11%-ке өсуін қамтамасыз етеді", – деді Тоғжанов мәжіліс отырысында.
Нәтижесінде 4,2 миллион адамның әлеуметтік төлемі ұлғаяды.
Бұл мақсатқа нақтыланған бюджетте 111 миллиард теңге көзделген.
Жалпы әлеуметтік міндеттемелерді орындауға бюджеттен 4 триллион теңге қарастырылған. Бұл өткен жылмен салыстырғанда 230 миллиард теңгеге артық.
