Наурыз батасы
Ұлыстың ұлы күнінде үлкеннен бата алу – дәстүріміздің төресі. Аудан жұртшылығына батагөй қария, соғыс және еңбек ардагері, ғасыр куәгері Яхия Тасыров бата береді.Ұлысың оң болсын,
Ақ мол болсын,
Қайда барсаң да жол болсын!
Ұлыс бақты болсын,
Төрт түлік ақты болсын!
Ұлыс береке берсін,
Бәле-жала жерге енсін!
Ұлы халқым тоқ болсын,
Көйлектерің көк болсын!
Қайғы, уайым жоқ болсын,
Қуаныштарың көп болсын!
Ниеттерің ақ болсын,
Наурыздың ақша қарындай,
Бастарыңа бақ қонсын,
Шашыңның барлық талындай.
Санасы өсіп адамның,
Көңілде кір қалмасын.
Құты қашып жаманның,
Жақсы тапсын жалғасын.
Тыныш болсын даламыз,
Түгел болсын нуымыз,
Таза болсын ауамыз,
Тұнық болсын суымыз.
Қатыгездік жоқ болсын,
Оралмасын кез өгей.
Кірісіміз көп болсын,
Бүгінгі Наурыз көжедей!
