Қазақтың жанашыры қазақ қана...
Сүйінші, ағайын! Қазақ халқының саны 19 миллионға жетті. Бұл тұғырлы Тәуелсіздіктің 30 жылдық мерейлі мерекесі қарсаңындағы көңілге қонымды, құлаққа жағымды қуанышты жаңалық. Осынау сүйінші хабарды жұртшылыққа Ел Президенті Қ.Тоқаевтың жеткізуінің өзі ұлтымыз үшін үлкен мәртебе.Үшінші тамыз күні Мемлекет басшысы өзінің «Twitter» әлеуметтік желісіндегі парақшасында қуанышты жаңалықпен бөлісті.
«Тәуелсіздіктің 30 жылдығы қарсаңында Қазақстан халқының саны тарихи межеге жетті. Алматы облысында дүниеге келген Жәния Азаматқызы еліміздің он тоғыз миллионыншы азаматы ретінде тіркелді. Жәния – отбасында төртінші бала. Ата-анасы мен қазақстандықтарды осы қуанышпен құттықтаймын. Бауы берік болсын!», – деп жазды Мемлекет басшысы.
Қуанышты хабарды естіп, қуанбаған қазақ кемде-кем. Өйткені, халық санының артуы – ұлттық қауіпсіздігіміздің кепілі. Бейбітшіліктің арқасында жыл санап халқымыздың санының артуы – Тәуелсіздіктің мәуелі жемісі. Осы ретте қоғамда қызу талқыланып, жоғары бағаланған хабарға қатысты Стратегиялық жоспарлау және реформалар агенттігінің ұлттық статистикасы бюросы Қазақстанның 19 миллионыншы тұрғыны қалай анықталғанын түсіндіріп берді.
Ұлттық статистикасы бюросының халықтың ағымдағы есебі бойынша әзірлеген деректеріне сәйкес 19 миллионыншы Жәния Азаматқызы 2021 жылғы 20 маусымда дүниеге келген. Жәния Алматы қаласында туған, отбасында 4-ші бала. Туу туралы актісіне сәйкес нәрестенің ата-анасы Алматы облысы Іле ауданына қарасты ауылда тұрады.
«19 миллионыншы тұрғынды анықтау барлық демографиялық оқиғаларды: табиғи қозғалыс өсімін (белгілі бір кезеңде тірі туғандар мен қайтыс болғандар арасындағы айырма) және халықтың көші-қон айырымын (еліміздің аумағына белгілі бір кезеңде келгендер саны және оның шегінен тыс кеткендер саны арасындағы айырма) ескеріп жүргізілді. Кандидатура жалпы республика бойынша тұратын жеріне тәуелсіз анықталды. Жалпы, тәуелсіздік жылдары ішінде халық саны 2 557,9 мың адамға (15,5%) өсіп, ағымдағы жылғы 1 шілдеге дейін 19 009,6 мың адамды құрады» делінген ресми органның мәлімдемесінде.
Осы ретте белгілі ақын Күләш Ахметованың ұлттық намысты жани түсетін рухты өлеңі ойға оралады. Ақын:
«Қазақты жамандама, қазақ бала,
Халық қой, қазақ деген аз-ақ қана.
Мәңгілік ай астында, жер үстінде,
Қазақтың жанашыры – қазақ қана...» деп тебіренген-ді. Бұл өлеңнің жазылғанына қазір ширек ғасырдан асты. Халқымыздың саны да жыл сайын өсіп келеді. Сондықтан жаңадан отбасы құрған жас жұбайлар бір-бірінің қадірін біліп, ұлттық қауіпсіздігімізді сақтап, қолға алған стратегиялық жоспарларымызды орындау үшін халық санын арттыруға үлес қоса беруі қажет. Лайым, халқымыздың саны артып, қазақ елінің мерей-мәртебесін арттыратын ұрпақ көбейе берсін!
А.ИБРАГИМҰЛЫ
