Мемлекеттік қызметші Әдеп кодексін қатаң ұстауы тиіс

Мемлекеттік қызметшілер Қазақстан Республикасы Президентінің 2015 жылғы 29 желтоқсандағы №153 Жарлығымен бекітілген Мемлекеттік қызметшілердің әдеп кодексімен белгіленген талаптарды сақтауға міндетті. Негізінен, мемлекеттік қызметшілер жұмыс уақытынан бос уақыттарында да Әдеп кодексін қатаң ұстауы тиіс. Демек, қызметкер барынша сыпайы, өзінің лауазымдық артықшылығын жеке басының пайдасы үшін қолданбайтын адал, кез келген сәтте сабырлы, ұқыпты болғаны жөн. Сондай-ақ мемлекеттік қызметшілердің жеке өмірінде де аңдап басып, өз ісімен өзгеге үлгі болуды естен шығармағаны абзал.

Мемлекеттік қызметші – қоғам айнасы. Олардың өздері қабылдайтын шешімдердің заңдылығы, әділдігі мен ашықтығын қамтамасыз етуі, жеке сипаттағы мәселелерді шешу кезінде өзінің қызметтік жағдайын пайдаланбауы, іскерлік әдепті және ресми мінез-құлық қағидаларын сақтауы өте маңызды.

Жұмыстан тыс уақытта да мемлекеттік қызметші беделін түсіретін және қоғам тарапынан сын мен айыптау тудыратын жағдаяттардан сырт жүруі қажет. Мемлекеттік қызметкердің сыртқы бейнесі, киім-киісі, қимыл әрекеттері, сөйлеу мәнері, ой-пікірі тұтынушының көңілінен шығып, ар-намысына нұқсан келтірмеуі тиіс.

«Ұлтына, жұртына қызмет ету білімнен емес, мінезден» деген Алаштың арысы Әлихан Бөкейханов. Сондықтан еліміздің ертеңі бүгінгі мемлекеттік қызметшілердің адамдық парасаты мен ар-ожданына және кәсібилігіне байланысты болғандықтан, елге адал абыроймен қызмет ету – басты парызымыз.

Меңдігүл АСАН,
Сырдария аудандық сотының
жетекші маман-баспасөз хатшысы