Жақсылық жасап жарысайық

Өздеріңізге белгілі, ҚР Президенті Қасым-Жомарт Кемелұлы Тоқаев Дүние­жүзілік денсаулық сақтау ұйымының жаңа COVID-19 коронавирусын пандемия деп жариялануына байланысты 2020 жылдың 16 наурызынан бастап төтенше жағдай жариялады. Осыған орай мемлекеттік және стратегиялық маңызы бар нысандарды күзету күшей­тіліп, ірі сауда орындарының жұмысы шектелді. Сондай-ақ ойын-сауық орта­лықтары, театр сияқты көп адам жина­латын нысандардың жұмысы тоқта­тылды.

Президент тапсырмасына сәйкел ел Үкіметі халықтың өмір сүру қауіпсіздігі үшін жауапкершілікті өз мойнына алды. Бұл сөзімізге мемлекет тарапынан көрсетіліп жатқан әлеуметтік көмектер дәлел бола алады. Мұнан бөлек ерікті жастардың бастамасымен де игі істер жүзеге асырылуда. Бұл жұмыс Сырдария ауданында да жүргізілуде.

Бүгінде ерікті жастардың бір арнаға тоғысқан күш-жігерінің негі­зінде аудан­дағы аз қамтамасыз етіл­ген отба­сы­ларға қайырымдылық көмек көрсеттік. Оның ішінде аз қамтылған көп балалы отбасылар, І топтағы мүгедек азаматтар, мүгедек баланы тәрбиелеп отыр­ған отбасылар, жетім балалар, ҰОС ардагерлері және оларға теңестірілгендер, тыл еңбеккерлері бар. Біз қайырымдылық көмек көрсету барысында қосымша түсіндірме жұмыстарын да жүргізіп келеміз. Оның ішінде азаматтарды үйде болуға, талап пен тәртіпті орындауға шақырудамыз. Сала мамандары тарапынан арнайы әзір­ленген үнпарақтар да таратылды. Сондай-ақ азық-түліктен бөлек бетперделер мен антисептиктер берілді.

Биыл еріктілер жылы. Бұл жастар­ға зор жауапкершілік жүктейді. Біз қайырымдылық іс-шараларын әлеумет­тік же­ліде ақпараттандырып келеміз. Біздің жұмысымызға ау­данның азаматтары көмектесуде. Оның ішінде мектеп бі­тіргендеріне 10, 20, 30 жыл болған түлектер ерекше атсалысуда. Ауданның белсенді жастары ірі сауда нысандарында да халыққа ақпараттық-насихаттық жұмыстар жүргізуде. Осы ретте игі іске үлес қосып, жақсылық жасап жарысуға ұмтылған жастарға шынайы алғысымды білдіремін. Ерікті жас ретінде қиын кезде сабырлық сақтап, қамқорлық танытып, өзін-өзі оқшаулап, қоғамдағы қарым-қатынасты барынша азайтуға шақырамын.

Ербол Сағынбайұлы,
ерікті жас, жастар мәслихатының депутаты