ҚХА Төрағасының орынбасары Марат Әзілханов Қызылордадағы бірқатар әлеуметтік-мәдени нысандарды аралады

Қызылорда қаласына жұмыс сапарымен келген Қазақстан халқы Ассамблеясы Төрағасының орынбасары – ҚР Президенті Әкімшілігінің ҚХА хатшылығының меңгерушісі Марат Әзілханов өңірдегі әлеуметтік, мәдени және рухани даму бағытында қолға алынған ірі жобалармен танысты. Іссапар барысында ең алдымен Қызылорда қаласында бой көтеріп жатқан жаңа Достық үйінің құрылыс барысын көріп, бұл нысанның этносаралық татулық пен қоғамдық келісімге қызмет ететін маңызды алаң болатынын атап өтті. Заманауи талаптарға сай салынып жатқан бұл ғимарат – этномәдени бірлестіктердің, қоғамдық ұйымдардың, жастардың бірлескен жобаларын жүзеге асыруына мүмкіндік беретін жаңа форматтағы кеңістік болмақ.

Сонымен қатар, Марат Әзілханов жаңа ашылған облыстық музейге барып, өңір тарихы мен мәдениетінің терең қабаттарымен танысты.

Сапар аясында Ассамблея Төрағасының орынбасары “Анаға тағзым”орталығына, жасөспірімдерге арналған “Сыр жұлдыздары” шығармашылық-инновациялық академиясына, Отбасы және Өнер орталықтарына, жаңадан салынып жатқан қаланың іргелі спорттық инфрақұрылымы саналатын және евростандарттарға сәйкес келетін орталық стадионның құрылысына барды. Әрбір нысандағы жұмыстармен жан-жақты танысып, өңірде рухани-мәдени жаңғыру бағытында атқарылып жатқан игі істерге оң бағасын берді.

Қоғамдық даму басқармасы