10 айда игерілген қаржы – 99,6 пайыз

Жергілікті бюджет – қаржы жүйесінің негізі. Бюджетте ақша қоры қалыптасып, жергілікті атқарушы орган­­дар­дың міндетін іске асыруға қаржылай негіз жасалады. Орталық­тан­дырылған ақша қоры немесе мемлекеттік бюджеттің мазмұны қозғалма­лы. Яғни, ақша көлемі үнемі ауысып, түсім түрлері, шығыстардың бағыты да өзгеріп отырады.

Мемлекеттік және жергілікті бюджет қаржысы – мем­ле­кеттік қазынаның бір бөлігі. Бюджет қоғам дамуының нақты кезеңінде неғұрлым маңызды міндеттерді шешуге қызмет етеді.

Аудандық қаржы бөлімінің басшысы А.Есмағанбе­това­ның айтуынша, жоспарлы жұмыстар атқарылып, биылғы 10 айда түскен түсімдер 10835,9 млн теңгеге немесе 101,6%-ға орын­далған. Асыра орындалғаны 169,0 млн теңге. Оның ішінде, ауданның өз кірістері 3569,5 млн теңгеге немесе 103,8%-ға орындалып, 130,7 млн теңге артық түскен.

– Түсім түрлеріне жеке тоқталатын болсақ, салықтық түсімдердің болжамы 103,6 пайызға (жоспары 3415,1 млн теңге, нақты түсімі 3539,5 млн теңге), салықтық емес түсімдердің болжамы 136,7 пайызға (жоспары 9,6 млн теңге, нақты түсімі 13,1млн теңге), негізгі капиталды сатудан түсетін түсімдердің жоспары 119,9 пайызға (жоспары 14,1 млн теңге, нақты түсімі 16,9 млн теңге) орындалып отыр. Республикалық және облыстық бюджеттерден 6896,8 млн теңге трансферттер алынды. Оның ішінде, субвенция – 4309,2 млн теңге (100%), ағымдағы нысаналы трансферттер – 1805,4 млн теңге (99,5%), дамуға арналған нысаналы трансферттер – 782,2 млн теңге (100%). Аталған мерзімде қарыздардың түсімі 260,9 млн теңгені құрады. 108,6 млн теңге көлемінде бюджеттік несие өтелді, – деді бөлім бас­шысы.

Сонымен қатар шығындар жоспары ағымдағы жылдың 10 ай­­дағы қоры­тындысымен 10770,0 млн теңгеге немесе 99,6 пайызға орындалған. Иге­рілмеген қаражат – 39,8 млн теңге. Оның 26,8 млн теңгесі жоғары бюджеттен берілетін трансферттер, қалған 13,0 млн тең­ге жер­гілікті бюджеттен бе­­ріл­­ген қа­ражат есебінен құрал­ған.

Жалпы игерілмей отырған қаражатты тал­­даған бөлім бас­шысы:

– 44,1 пайызы кент, ауыл­дық округ әкімінің аппараттарына, 49,6 пайызы тұрғын үй-коммуналдық шаруашылығы, жолаушылар көлігі және автомобиль жолдары бөліміне, 4,8 пайызы жұмыспен қамту, әлеуметтік бағдарламалар және азаматтық хал актілерін тіркеу бөліміне тиесілі, – деді.

Жергілікті өзін-өзі басқару бюджеттерінің атқа­ры­луы, яғни бюджеттің төртінші деңгейі бойынша 2022 жылға арналған бюджетінің кірістері 2006,8 млн тең­ге көлемінде түзетілген. Салықтық түсімдер бойынша жоспарланғаны 92,3 млн теңге, нақты 98,9 млн теңгеге немесе 107,1 пайызға орындалған. Салықтық емес түсімдер бойынша жоспарланғаны 5,7 млн теңге, нақты 7,1 млн теңгеге немесе 126 пайызға орындалса, негізгі капиталды сатудан түсетін түсімдер 190,2 пайызға орындалыпты.

– Есепті кезеңде аудандық бюджеттен 533,3 млн теңге көлемінде трансферттер (100%), 990,1 млн тең­ге көлемінде субвенциялар (100%) аударылды. Шығын­дардың есепті кезеңге төлемдер бойынша жос­пары 1667,6 млн теңге, нақты 1650,1 млн теңгеге немесе 98,9%-ға атқарылды, – деді А.Есмағанбетова.

Бибісара ЖАНӘЛІ