Өзбекстанның әділет министрлігі Вашингтонда орналасқан халықаралық білім бойынша Америкалық кеңестің (American Councils for International Education) жергілікті бөлімшесін ресми түрде тіркеуге алды, деп хабарлайды Baq.kz ақпарат агенттігі.
Бұл Өзбекстанда соңғы он жылдан астам уақыттың ішінде аккредитациядан өткен алғашқы америкалық үкіметтік емес ұйым.

Өзбекстандық UzDaily.com сайты 30 тамызда Өзбекстанның әділет министрінің орынбасары Акбар Ташкуловтың АҚШ елшісі Памела Спратленге ұйымның сертификатын тапсырғанын хабарлады.

Халықаралық білім бойынша Америкалық кеңес білім беру және білім алу алмасу бағдарламасын жүзеге асырады. Вашингтондағы баспасөз брифингісінде АҚШ мемлекеттік департаментінің баспасөз хатшысы Хизер Нойерт бұл қозғалыс “АҚШ пен Өзбекстан арасындағы дамып келе жатқан стратегиялық әріптестік пен Өзбекстан үкіметінің маңызды реформа мен халықаралық қарым-қатынасты жандандыру бойынша міндеттемелер алғанын” көрсетеді деді.

Бұл қадам екі ел азаматтарының қарым-қатынасын нығайтады деп айтқан Нойерт америкалық кеңес “АҚШ пен Өзбекстан арасындағы ғылыми және мәдени алмасулар бойынша көп мүмкіндіктерге жол ашады” деп атап өткен.