Жұқпалы дерттен сақтану жолы қарастырылды

«Руханият орталығында» ұйымдас­тырылған оқу-жаттығуға Сырдария ауданы әкімінің орынбасары Талғат Нұртазаев, ҚР Ауыл шаруашылығы министр­лігі Ветеринариялық бақылау және қадағалау комитетінің Қызылорда облыстық аумақтық инспекциясының басшысы Ерсұлтан Апетов, Қызылорда облыстық ветеринария басқармасының басшысы Шахмардан Қойшыбаев, Республикалық ветеринариялық зерт­ха­наның Қызылорда облыстық филиалының директоры Манас Шатенов, «Республикалық эпизоотияға қарсы отряд» Қызылорда облыстық филиалының басшысы Сағидулла Серімбетов, аудандық және қалалық аумақтық инспекциялардың, ве­тери­нариялық станциялардың басшылары, эпизоотолог мамандар, ветери­нариялық пункт мең­герушілері, жер­гілікті атқарушы органдардың, төтен­ше жағдайлар қызметі мен сани­тариялық-эпидемиологиялық бақылау с­аласының өкілдері қатысты.

Жиынды аудан әкімінің орынбасары Талғат Нұртазаев ашып, оқу-жаттығудың маңыздылығына тоқтал­ды.

– Бүгінгі оқу-жаттығудың басты мақсаты – аусыл секілді аса қауіпті жұқпалы ауру анықталған жағдайда барлық жауапты органдардың үйлесім­ді әрі жедел әрекет ету қабілетін жетілдіру. Мал шаруашылығы – аудан экономикасының маңызды саласының бірі. Сондықтан ветеринариялық қа­уіп­сіздікті қамтамасыз ету – баршаға ортақ міндет. Осындай тәжірибелік іс-мамандардың кәсіби даярлығын шыңдап, төтенше жағдайлар кезінде нақты әрі тиімді шешім қабылдауға мүмкіндік береді. Алдағы уақытта ауданда тұрақты эпизоотиялық ахуалды сақтау бағытындағы жұмыс жүйелі түрде жалғасын табады, – деді аудан әкімінің орынбасары.

Жиында ҚР Ауыл шаруашылығы министрлігі Ветеринариялық бақылау және қадағалау комитетінің Қызылорда облыстық аумақтық инспекциясының басшысы Ерсұлтан Амантайұлы мұндай оқу-жаттығулардың маңызы жоғары екенін атап өтті.

– Ветеринариялық қауіпсіздікті қам­тамасыз ету – ауыл шаруашылығы саласының тұрақты дамуына тікелей әсер ететін маңызды міндеттің бірі. Аса қауіпті жұқпалы аурулардың алдын алу, олардың таралуына жол бер­меу және індет жағдайында жедел әрекет ету үшін кез келген жауап­ты маманның дайындығы әрдайым жоғары деңгейде болуы қажет. Бүгінгі ауданаралық оқу-жаттығудың маңызы зор. Себебі мұндай тәжірибелік іс-шара барысында ветеринариялық қыз­мет мамандары нақты жағдайға жақын сценарий бойынша жұмыс жасап, ауру ошағын анықтау, оқшаулау, сынама алу, залалсыздандыру және шектеу іс-шарасын ұйымдастыру бағы­тындағы іс-қимылын жетілдіреді. Сонымен қатар мемлекеттік органдар мен жауапты мекемелер арасындағы өзара байланысты нығайтуға мүмкіндік береді. Аусыл – мал шаруашылығына елеулі қауіп төндіретін аса қауіпті жұқпалы аурудың бірі. Сондықтан оның алдын алу бағытындағы профи­лактикалық жұмысты тұрақты жүргі­зу, ветеринариялық талаптың сақ­талуын қамтамасыз ету және маман­дардың кәсіби біліктілігін арттыру – басты назардағы мәселенің санатында. Осындай оқу-жаттығу вете­ри­нариялық қызметтің шұғыл әрі үйлесімді әрекет ету қабілетін арттырып, төтенше жағдай туындаған кезде нақты шешім қабылдауға мүмкіндік береді. Алдағы уақытта да өңірдегі эпизоотиялық ахуалды тұрақты сақ­тау, жануарлар ауруларын болдырмау және ветеринариялық қауіпсіздікті қам­тамасыз ету бағытындағы жұмыс жүргізіледі, – деді Ерсұлтан Апетов.

Оқу-жаттығудың негізгі мақсаты – аусыл ауруы тіркелген жағдайда жедел әрекет ету алгоритмін пысықтау, мемлекеттік органдар арасындағы өзара іс-қимылды жетілдіру және қабыл­данатын шаралардың тиімділігін арттыру екені даусыз. Жалпы алғанда, іс-шарада жауапты бірнеше мекеменің мамандары төтенше жағдай кезіндегі іс-қимылын пысықтап, ветеринариялық қызметтердің дайындығын арттыруға күш жұмылдырылды.

Жаттығу барысына сәйкес, Терең­өзек кенті маңындағы шартты «Мақсат» шаруа қожалығында екі бас ірі қара малдан аусыл ауруына тән клиникалық белгі анықталған. Атап айтқанда, жануарлардың дене қызуы көтеріліп, ауыз қуысы мен тұяқ аралықтарында күлдіреуік тәріз­ді зақымдану байқалған. Шартты хабарлама түскеннен кейін ветери­нариялық мамандар оқиға орнына жедел жетіп, эпизоотиялық зерттеу жұмысын жүргізді. Ауруға күдікті малдан биологиялық сынама алынып, зерт­ханалық тексеруге жөнелтілді. Шаруашылық аумағында уақытша шек­теу шарасы енгізіліп, ауру ошағын оқшаулау, залалсыздандыру және жануар­лардың қозғалысын бақылау жұмысы ұйымдастырылды.

Практикалық бөлім кезінде карантин енгізу тәртібі, ветеринариялық бекеттерді орналастыру, халық арасында түсіндіру жұмысын жүргізу және мемлекеттік органдардың бірлескен іс-қимыл тетігі тәжірибе жүзінде пысық­талды. Кез келген қатысушы шартты жағдайға сәйкес өз міндетін атқарып, төтенше жағдай туындаған кездегі әрекет алгоритмін нақтылады.

Мамандардың айтуынша, мұндай оқу-жаттығулар ветеринариялық қыз­меттердің кәсіби дайындығын арттырып, аса қауіпті аурулар тіркелген жағдайда жедел әрі тиімді шешім қабылдауға мүмкіндік береді.