«Тіршілік тынысы» газетінің ұжымы жаңа Ата Заң жобасын талқылады
Сырдария аудандық «Тіршілік тынысы» газетінің ұжымы жаңа Ата Заң жобасын талқылады. Аудандық газеттің бас редакторы, аумақтық коалиция мүшесі Аружан Мұханбетқали Конституция жобасында өзгеріске ұшыраған баптарға тоқталып, ел болашағы үшін жасалып жатқан ауқымды жобаның өміршеңдегін айтып өтті. – Мемлекетіміздің басты құжаты 80 пайызға жуық жаңартылғалы тұр. Жаңа Конституция жобасы – елдегі саяси жаңғырулардың заңды әрі кезең-кезеңімен жүзеге асып келе жатқан реформалардың жалғасы. Бұл құжат мемлекеттілікті нығайтып қана қоймай, билік пен қоғам арасындағы өзара жауапкершілікті күшейтеді, азаматтардың шешім қабылдау үдерісіне белсенді араласуына жол ашады. Негізгі құндылық – адам және оның құқықтары мен бостандықтары. Бұл ретте, тұрғындар өз таңдауын жасай алады, – деді А.Мұханбетқали.
Жаңа Конституция жобасы жергілікті жерлердегі аумақтарды дамыту арқылы тұрғындардың өмір сапасын жақсартуға, инфрақұрылымды жаңартуға және әлеуметтік-экономикалық қолжетімділікті арттыруға бағытталғаны жөнінде басылым ұжымына кеңінен мәлімет берілді. Қаламгерлер Ата Заң жобасына байланысты ойларын ортаға салды.
