«Таза Қазақстан»: аймақта 13 мың түп тал егілді
Күз айының жайма-шуақ күндерінде аймақ тұрғындары «Таза Қазақстан» акциясы аясында тал егу жұмысын белсенді жүргізді. Өткен сенбіде облыс орталығында аймақ басшысы Нұрлыбек Нәлібаевтың қатысуымен қайта жаңғыртудан өткен Қорқыт ата саябағында ағаш көшеттері егілді.Экологиялық акцияға ҚР Парламенті Сенатының депутаттары, зиялы қауым өкілдері, ел ағалары және қала тұрғындары келді.
«Қорқыт ата» кітабының 1300 жылдығына арнап орнатылған ескерткіш маңындағы саябақ ел игілігіне 2002 жылы берілген. Бүгінде толық жаңарып, тұрғындардың демалысына, серуендеуіне, балалардың ойнауына қолайлы орынға айналған саябақ қаланы келбетімен көркейтіп тұр. «Таза Қазақстан» жалпыұлттық экологиялық акциясы аясында өңірдің барлық елді мекенінде оның ішінде біздің ауданда да жаппай сенбілік, тал егу жұмысы ұйымдастырылды.
Сенбілікке аудан әкімі Берік Сәрменбаев, аудандық мәслихат төрағасы Ержан Әжікенов, облыстық мәслихат депутаты Жұмабек Ембергенов, аудандық мәслихат депутаттары Алмас Есназар, Ақтөре Ибрагимұлы, Болатбек Ұлтанбекұлы, мемлекеттік мекеме қызметкерлері, еріктілер және аудан тұрғындары белсене атсалысты. Кент орталығындағы «Тағзым» алаңында жаңа көшеттер бой көтеріп, күтімге алынды. Осы күні кент және ауылдық округтерде көркейту-көгалдандыру және санитарлық тазалық жұмыстары ұйымдастырылды.
Тазалық жұмыстарына барлық мекеме қызметкерлері қатысып, көшелер, саябақтар мен қоғамдық орындарда талдарды балақтау, шөптерді шабу жұмыстары жүргізілді.
Айту керек, жалпы экологиялық акцияға өңірден 20 мыңға жуық адам қатысты. Еріктілер, экобелсенділер, үкіметтік емес ұйымдар өкілдері, кәсіпорындар мен мекеме қызметкерлері белсенділік танытты. Нәтижесінде облыс аумағына 13 мың түп тал егілді.
Б.ЖАНӘЛІ
