Экологиялық акция қарқын алды
Әр аптаның сенбісінде «Таза Қазақстан» экологиялық акциясы жүзеге асып, ауданға қарасты Тереңөзек кенті мен барлық елді мекенде тазалық жұмысы жүргізілуде. Өткен аптада аудан әкімі Берік Сәрменбаев жалпыхалықтық сенбіліктің өткізілу барысын көріп, республикалық акцияға үлес қосты.Аудан басшысы Тереңөзек кенті бойынша жүргізіліп жатқан сенбілік барысында аудан тұрғындарына тазалық барлық азамат үшін басты орында екенін жеткізді.
– «Таза Қазақстан» экологиялық акциясы – жалпыхалықтық сенбілікпен шектелмейді. Айналаны күл-қоқыстан тазарта отырып, жергілікті халықты қоршаған ортаны ластамауға шақыруымыз керек. Баршамыз көркейту-көгалдандыруға айрықша мән беріп, Тереңөзек кенті бойынша көшелердің тазалығына тиісті мекеме мамандары жауапкершілік танытқаны жөн. Аудан тұрғындарын абаттандыру іс-шараларына белсене қатысуға және тазалық сақтауға шақырамын, – деді аудан басшысы.
Өз кезегінде аудан басшысы «Жалын» жазғы сауықтыру лагерінің қорытынды дайындық жұмыстарымен танысты. Сенбіліктен Тереңөзек кентінен сайланған халық қалаулылары да қалыс қалмады. Аудан көлемінде бөлініске сай сенбілік алдағы уақытта тұрақты жалғасын табады.
Б.АЯБЕКҰЛЫ
