Жаңа қосымша іске қосылады
Елімізде ата-аналарға балаларды ерте жастан күту және дамыту бойынша консультациялық көмек көрсету үшін жаңа мобильдік қосымша іске қосылды. Ол – «Беске дейін үлгер» қосымшасы деп аталады. Бұл туралы Орталық коммуникациялар қызметінде өткен брифингте Мектепке дейінгі білім департаментінің директоры Манар Адамова мәлім етті.Жаңа қосымша үйде бала тәрбиелеп отырған ата-аналарға маңызды мәселелер бойынша қолжетімді контент ұсынады. Бұл денсаулық, тамақтану, білім беру, дағдыларды дамыту және балалармен өзара әрекеттесуге байланысты тақырыптарды қамтиды. Барлық қолданбалы материалдар нейробиологиялық зерттеулер негізінде әзірленген. Яғни олардың тиімділігі мен практикалық құндылығына кепілдік беріледі. Қосымшаның мазмұнында біздің мәдени-тарихи құндылықтарымыз да ескерілген.
– Қазіргі уақытта қосымша Қарағанды, Шығыс Қазақстан, Қызылорда және Ақтөбе облыстарындағы мектепке дейінгі ұйымдарда сынақтан өтіп жатыр. Толық іске асыру қараша айына жоспарланған. Сонымен қатар мазмұны кеңес беру орталықтарында қолжетімді болады, онда ата-аналар іс-шараларға қатысты идеялар мен практикалық кеңестер алады, – деп атап өтті М.Адамова.
Өтінішті мектепке дейінгі ұйымдардың консультация орталықтары арқылы алуға болады. Сондай-ақ ата-аналар мектеп жасына дейінгі балаларды тәрбиелеу мен дамытуға қатысты мәселелер бойынша тәулік бойы әдістемелік және психологиялық қолдау ала алады.
«Тт» ақпарат
Фото: ernur.kz
