Егіншілердің қуанышына облыстық мәслихат депутаты, партия филиалы жанындағы экономика, кәсіпкерлік және аграрлық сектор мәселелері бойынша аймақтық кеңес төрағасы Бақдәулет Мақашев, «Қызылдиқан» шаруа қожа­лығының төрағасы Алданберген Құлбаев, «Бақ» шаруа қожалығының төрағасы Серік Әбжәлиев бастаған азаматтар мен ауыл ардагерлері қатысты. Аудан әкімінің орынбасары Талғат Нұртазаев егіншілерді науқандық жұмыстардың бас­талуымен құттықтады.

– Күріш – Сыр бойының негізгі байлығы. Егін егу саласына зор қолдау көрсетіп ке­леді. Соның нәтижесінде ша­руа­шылық құрылымдары да жұмыс сапасын арттыруда. Ен­дігі мәселе – осы байлықты шаш­­пай-төкпей, ысырапсыз жи­нап алып, халықтың игі­лігіне жарату. Астық мол болып, қырман тасысын!, – деді Талғат Мейрамханұлы.

Бригадир Батырбек Сарыбаев жетекшілік ететін №1 бригаданың егістік алқабында ұйымдастырылған іс-шарада ел ағалары егінге орақ салу лентасын қиды. Қалжан ахун ауылдық ардагерлер кеңесінің төрағасы Болат Дүйсенбаев ақ бата беріп, сәттілік тіледі. Өз кезегінде облыстық мәс­лихат депутаты, белгілі меценат Бақдәулет Мақашев пен «Қызылдиқан» шаруа қо­жалығының төрағасы Алданберген Құлбаев тілектестігін білдірді.

– Бүгін – ерекше күн. Жыл бойы баптаған күрішке орақ түсіп, егіншілердің төккен тері мен еткен еңбегі өз жемісін береді. Бұл – нағыз еңбектің мерекесі. Ал еңбек ұғымы бәрімізге ортақ құндылық. Сол себепті, баршаңызды шын жүректен егін жинау жұмыстарының басталуымен құттықтаймын. Әлемде күріштен мол өнім алу бойынша рекордтық көрсеткішке қол жеткізген дала академигі Ыбырай Жақаевтан «Рекордтық өнім алудың құпиясы қандай?» деп сұрағанда, даңғайыр диқан «Алдымен еңбек, содан соң еңбек және еңбек» депті. Сол секілді, еңбектеріңіз жемісті болсын! Қамба алтын дәнге толсын!, – деді Бақдәулет Еркінбекұлы.

Берекелі де мерекелі іс-шара аясында ауыл ардагерлері мен егіншілердің құрметіне дастарқан жайылып, ас берілді. Ақ дастарқан басында бас қосқан көпшілік жылы лебіздерін ортаға салып, даланы дүбірге бөлеген думанды жиын ардагерлердің ақ батасымен қорытындыланды.

– «Бақ» шаруа қожалығы биыл 515 гектарға күріш екті. «Егінші жылда арманда» дегендей биылғы жылдан да үмітіміз зор. Бұйырса, жігіттер ел ырысын шашпай-төкпей уақытылы жинап алады деп сенеміз. Соңғы жылдары су тапшылығы мәселесі шаруа­ларды алаңдатты. Бірақ Мемлекет басшысының қол­дауымен Үкімет пен облыс әкімінің ықпалымен егін егу науқанында судан тапшылық көрген жоқпыз. Шаруалардың атынан мемлекеттік қолдау шараларын жүйелі ұйым­дас­тырып жатқан басшыларға айтар алғысымыз шексіз, – деді «Бақ» шаруа қожалығының төрағасы.