«Сіздің жолаушыңыз – бала» акциясының басты мақсаты – балаларды жолда жүру ережелерімен таныс­тыру, жол қауіпсіздік ережелерін сақтау, жол белгілерін білу қажеттілігін, жол ережесін білудің маңызын, жол-көлік оқиғаларының алдын алу және қауіпсіздік қағида­ларын насихаттау бойынша тиісті жұмыстар жүргізу.

Жедел профилактикалық іс-шара аясында жүргі­зіліп жатқан акция бойынша Сырдария ауданы Полиция бөлімінің жергілікті полиция қызметі бөлім­шесінің патрульдік полиция тобының инспектор­лары мектеп оқушыларымен кездесу өткізіп, жол қауіпсіздігі ережелері туралы бағыт-бағдар беріп, түсіндірме жұмыс­тарын жүргізуде. Кездесу барысында кәмелетке толма­ғандардың кінәсінен болатын жол-көлік оқиғаларының алдын алу, жолға жүгіріп шықпау, жол ережелерін қатаң сақтау керектігі ескертілді. Сонымен қоса оқушыларға жол-көлік оқиғасының салдарынан болатын ауыр және жеңіл түрдегі жарақаттар мен олардың адам өміріне қаншалықты әсер ететінін түсіндіріп өтті. Оқушылар тарапынан қойылған сұрақтарға тиісті жауаптары берілді. Акция бойынша тиісті шаралар мен түсіндірме жұмыстары наурыз айының біріне дейін жалғасын табады.

– Соңғы уақытта жол-көлік оқиғасы салдарынан балалар зардап шегуде. Әсіресе, мектеп оқушылары. Біз өз кезегімізде акция бойынша аудан көлемінде тиісті жұмыстар мен қауіпсіздік шараларын ұйымдастырудамыз. Басты мақсатымыз – балаларға жол қауіпсіздік ережелерін үйрету, жол-көлік оқиғасының салдарынан болатын ауыр жағдайлармен таныстыру, жол ережесінің адам өміріндегі маңыздылығы туралы балаларға түсіндіру. Жол қауіпсіздігі ережелерін сақтау тек оқушыларға ғана емес, сонымен қоса көлік жүргізушілеріне де қатысты. Мектеп маңайында оқушылар жиі жүретіндіктен мектептердің жанынан өтерде өте мұқият әрі сақ болу қажет. Балалардың қауіпсіздігін қамтамасыз ету мақсатында аудандағы мектептерді аралап, ақпараттық-түсін­дір­ме жұмыстары жүргізілуде, – дейді жергілікті полиция қызмет бөлімінің патрульдік полиция тобының қызмет аға инспекторы, полиция капитаны Бауыржан Айтбаев.