Сырдариялық түлектер ҰБТ тапсыруда
![](/uploads/posts/2024-01/medium/1706351643_dutl2ofgz8sdyayv6k9efwuh9mqntgll2ezuakpn.jpg)
Әдеттегідей электронды форматта 4 кезеңде тестілеуге қатысатын бітіруші түлектер қаңтар айындағы бірінші кезеңдегі ҰБТ-ға өтініш тапсырды. Өтініш қабылдау 2023 жылғы 29 желтоқсан мен 2024 жылғы 11 қаңтар аралығында Ұлттық тестілеу орталығының app.testcenter.kz сайтында және UTO қосымшасы арқылы жүргізілді. Алғашқы кезең болып саналатын қаңтар ҰБТ-да талапкер ЖОО-ға ақылы негізде қабылдану үшін шектік 50 баллдан жоғары ұпай жинауы тиіс. Өтініш берген түлектер 2024 жылғы 16 қаңтар мен 10 ақпан аралығында тестілеуден өтіп болады.
Айту керек, 2024 жылғы ҰБТ-да тестілеу форматына өзгерістер енгізілген. Яғни, Қазақстан тарихы бойынша тестілеуге қатысушылар 20 тапсырманы, оқу сауаттылығы – 10, математикалық сауаттылық – 10 және екі бейіндік пән бойынша 40 тапсырманы орындайды. Барлығы – 120 сұрақ. Сұрақ санында өзгеріс жоқ. Ең жоғары балл – 140. Тестілеудің жалпы уақыты – 4 сағат (240 минут). Сондай-ақ ерекше білім беру қажеттіліктері бар балалар үшін қосымша 40 минуттық уақыт сақталған.
Тестілеу кезінде калькулятор, Менделеев және тұздар ерігіштігі кестелері барлық талапкер үшін компьютер экрандарында қолжетімді болады. Сондай-ақ ҰБТ қатысушыларына өздерімен қалам, су және шоколад алып келуге рұқсат етілгенін еске саламыз.
Сырдариялық жас түлектерге алғашқы кезеңде сәттілік тілейміз.
«Тт» ақпарат
Фото: ашық дереккөзден