Тіршілік тынысы Tirshilik-tynysy.kz ақпараттық агенттігі
» » Алдағы жылы да ауқымды жұмыстар атқарылады

Алдағы жылы да ауқымды жұмыстар атқарылады

Бүгін аудан әкімі Берік Сәрменбаев Тереңөзек кенті және А.Тоқмағамбетов ауылының тұрғындарымен кездесті. Есепті кездесулерде тұрғындар бірқатар мәселелерді көтерді. Атап айтқанда, ауыз су, қоғамдық көлік, жол, білім, мәдениет, денсаулық салаларына қатысты маңызды мәселелер мен ұсыныстарын жеткізді. Әрбір тұрғынның жеке және әлеуметтік маңызы бар сұрағын жіті тыңдаған аудан басшысы оның шешілуіне жұмыс жасалатынын түсіндірді.

Есепті кездесулер барысында аудан әкімі Мемлекет басшысының тапсырмасымен, аймақ басшысының қолдауымен өңірде атқарылып жатқан айшықты жұмыстарға тоқталды. Оның ішінде, облыста әлеуметтік-мәдени нысандар бой көтеріп, халық игілігіне беріліп жатқанын атады. Соның негізінде ауданда да жоспарлы жұмыстар жүргізіліп жатқанын жеткізді.

Биыл Тереңөзек кентіндегі бірқатар көше жөндеуден өтті. Аудан орталығындағы спорт клубы күрделі жөндеуден өтсе, демеушілік есебінен көпқабатты тұрғын үйлердің сыртқы келбеті жаңарды, "Сыр сұлуы" монументі де жаңа кейіпке енді. Ал А.Тоқмағамбетов ауылындағы дәрігерлік амбулатория күрделі жөндеуден өтсе, елді мекенді газдандыру жұмыстары биыл бастау алды.

Берік Әбдіғаппарұлы ауданды дамыту бағытында алдағы жылы да ауқымды жұмыстар атқарылатынын айтты.

Есепті кездесуден соң аудан әкімі тұрғындарды жеке мәселелері бойынша қабылдады.
22 желтоқсан 2023 ж. 125 0