Тіршілік тынысы Tirshilik-tynysy.kz ақпараттық агенттігі
» » Президент Аралды құтқару қорын одан әрі дамытуға қатысты ұсыныстарын айтты

Президент Аралды құтқару қорын одан әрі дамытуға қатысты ұсыныстарын айтты

Мемлекет басшысы Аралды құтқару қорының құрылтайшы мемлекеттері басшылары кеңесі отырысында  ұйымды одан әрі дамытуға қатысты ұсыныстарын ортаға салды, деп хабарлайды Egemen.kz.

«Қордың ұйымдық құрылымы мен шарттық-құқықтық базасын жетілдіру процесін тезірек аяқтау маңызды мәселе болып қала береді. Қордың басқармасы мен Атқарушы комитетінің өкілеттілігін және жауапкершілігін кеңейткен жөн. Мемлекетаралық су шаруашылығын үйлестіру комиссиясын Мемлекетаралық су-энергетикалық комиссия ретінде қайта құруды ұсынамыз. Бұл шаралар Қордың тиімділігін арттырар еді», деді Қасым-Жомарт Тоқаев.

Сондай-ақ ол аймақтағы барлық елдің ирригация, гидроэнергетика және экология салаларындағы мүдделерін ескере отырып, Орталық Азияның су-энергетика ресурстарын тиімді пайдалану үшін ұзақ мерзімді әрі орнықты аймақтық ынтымақтастық механизмін құруды ұсынды.

«Біздің ойымызша, Халықаралық су-энергетика концорциумы осындай механизмнің рөлін атқара алар еді. Арал теңізі бассейніндегі су ресурстарын есепке алатын, мониторинг жасайтын, басқаратын және бөлетін бірыңғай автоматтандырылған жүйе енгізу бойынша жұмыс жоспарын әзірлеу. Бұл бастаманың жүзеге асырылуы аймақтағы суды пайдаланудың ашықтығын қамтамасыз етіп, Орталық Азия елдерімен арадағы диалогты және достықты нығайтуға ықпал етеді», деді Президент.

Бұдан соң, ол Орталық Азия елдерінің климат мәселелері жөніндегі жобалық кеңсесін құру туралы айтты. Бұл қадам климаттың өзгеруіне бейімделу және оның салдарын азайту үшін пәрменді шаралар әзірлеуге мүмкіндік береді.

«Біз Бішкектің Қорды жетілдіру жөніндегі Жұмыс тобының қызметіне атсалысуын оң бағалаймыз. Қырғыз Республикасы қайтадан Халықаралық Аралды құтқару қорының толыққанды мүшесі болады деп үміттенеміз. Келешекте біз бауырлас Қырғызстанның Қорға төрағалық етуін қуана құптаймыз», деді Қ.Тоқаев.

Фото: Аkorda.kz
15 қыркүйек 2023 ж. 194 0