Эпидемиологиялық ахуал күрделі

Коронавирус инфекциясының таралуы Сыр өңірінде қайта өршуде. Бірнеше күннен бері өңір­лердегі эпидемиологиялық ахуалды бақылау мат­рицасында Қызылорда облысы «қызыл» аймақта тұр. Шын мәнінде, індет жұқтырғандардың басым көпшілігі облыс орталығынан екенін айта кеткен жөн.

Облыс бойынша эпидемиологиялық ахуалдың күр­деленуі жөнінде өңіріміздің бас санитар дәрігері Динара Жаңабергенова мәлімдеме жасады.

– Күнделікті жүргізілетін эпидемиологиялық тал­дау нәтижелері көрсеткендей, «COVID-19» жұқ­тыр­­ғандардың басым көпшілігі вакцина сал­дырмаған адамдар. Қазір әлемде, республикада, аймақта эпидахуал өршіп тұр. Ауруханалардағы жүктемелер саны артты, індет жұқтырғандардың басым көпшілігі ауыр халде жатыр. Былтыр ау­рудың симптомсыз түрі көп тіркелген болса, биыл аурудың мутациялануынан ауыр ағымда өту­­де. Бұл жағдайды тұрақтандырудың жолы – сақ­тық шаралары мен вакцинация. Вакцина алу, оның қолжетімділігін қам­та­масыз ету үшін барлық жағдайлар жасалған. Онлайн түрде екпеге жа­зылып, өз емханаңызда неме­се ірі сауда орындарында ешбір ке­зек­сіз вакциналануға болады. Ауру­ды еңсеруге бірге күш салу­ға шақы­рамыз, – деді Динара Жаңа­бергенова.

Осы кезге дейінгі көрсеткіш бо­­йынша облыс көлемінде вак­цинаның 1 компонентін 220 060 адам, 2 компонентін 140 309 адам қа­был­даған.

Қазіргі таңда аудандық ауру­ханаға қарасты коронавирус ин­фекциялық бөлімшесінде 28 нау­қас емделіп жатыр. Оның ішінде, коронавирус белгісі бар пневмония­­дан 10 адамға, коронавирус инфекциясынан 18 адамға ем-шара жүргізілуде. 3 науқастың жағдайы ауыр болса, 3 жүкті әйел мен 2 бала инфекция жұқтырғандар қатарында. Науқастарға 3 дәрігер мен 10 медициналық орта буын және кіші буын қызметкері қолұшын созуда.

– Қазір аудан бойынша науқастар саны артып келеді. Жағдайы ауыр 3 науқас бұған дейін вакцина қабылдамаған. Қауіпті індет балалар мен жүкті әйелдерден анықталуы алаңдатады. Қай кезде де жақынымызға жанашыр болып, бейқамдық танытпайық. Әрбір науқастың денсаулығын жіті қадағалап, тиісінше ем-шара қолданатын боламыз, – дейді аудандық ауруханың жұқпалы аурулар бөлімшесінің меңгерушісі Манат Садықова.

Дәл осы күні аудандық санитариялық-эпиде­мио­­логиялық бақылау басқармасының мәлі­ме­тінше, жыл басынан бері 317 адам коронавирус жұқтырған.

Балтабай ОРДАБЕКОВ