Шуақты мереке мезіреті
Республика тарихында облыс әкімі болып тағайындалған тұңғыш әйел әкім ретінде Гүлшара Әбдіқалықованың есімі ерекше құрметпен аталса, ауданымызда да ең үлкен ауылды басқарып отырған әйел әкім бар. Ол – Шаған ауылдық округінің әкімі Ұлбала Абдраманова. Мемлекеттік қызмет саласының тәжірибелі маманы жыл сайын көктемнің шуақты мерекесін асыға күтеді. Себебі, ауылдың дамуына зор үлес қосқан әйел-аналар мен ісіне мығым қыз-келіншектерді, батыр аналар мен тыл ардагерлерін төл мерекелерімен құттықтайды.Жылдағы үрдіске сай Шаған ауылы әкімдігінде салтанатты басқосу ұйымдастырылды. Бұл жолғы іс-шара карантин талаптары сақтала отырып өткізілді. Жиналғандарды мерекемен құттықтаған ауыл әкімі шағандық нәзік жандыларға шынайы ілтипатын білдірді.
– Қоғамды, барлық саланы әйелдерсіз елестету мүмкін емес. Ерлермен бірге иық тірестіре еңбек етіп, жауапкершілікті абыроймен көтеріп, жемісті жұмыс істеп келе жатқан нәзік жандыларға құрмет ерекше болуы тиіс. Отбасы мен жұмысты қатар алып жүрген барша әйел-аналарға шексіз ризашылығымды білдіремін. Жұмыстарыңыз жемісті, дендеріңіз сау болып, ұрпақтарыңыздың қызығын көре беріңіздер. Мерекелеріңіз құтты болсын, – деді ауыл әкімі.
Өз кезегінде мерекелік қабылдауға қатысқан аналар ауыл әкімдігіне шексіз ризашылығын білдіріп, жұмыста жеміс тіледі. Аналар қауымы ақ тілектерін ортаға салып, елді мекеннің өркендеуіне, дамуына тілектес екенін жеткізді.
Б.Ордабеков
Пікір 7