Танымал әнші Батырхан Шүкеновтің жасалып жатқан ескерткішінің фотосы әлеуметтік желіде жарияланды. «ҚазАқпарат» тілшісі аталған мүсіннің авторымен хабарласып, ескерткіштің қайда орнатылатынын білді.    Айта кетерлігі, бүгінгі күні әншінің мүсіні Астана қаласындағы «КазАртСистем» жауапкершілігі шектеулі серіктестігінің мүсіншілер шеберханасында жасалып жатыр. Ескерткіштің биіктігі 2,5 метр. Қазіргі кезде саз жұмыстары аяқталып қалған. Енді қолаға аудару жұмыстары басталмақ.
    «Мүсінді жасап жатқанымызға екі айдай уақыт болды. Өткен жылы өткізілген конкурсқа қатысып, жеті-сегіз жұмыстың ішінен менің жобамды таңдап алған болатын. Ескерткіш Қызылорда әкімдігінің тапсырысымен жасалды. Ашылуы мамыр айына жоспарланған. Марқұмның ағасы Бауыржан келіп, жұмыстарды көріп тұрады. Қолына тенор-саксафонды ұстаттық» - дейді мүсін авторы, Қазақстан Суретшілер қауымдастығының мүшесі, Қазақстан Республикасының өнер академиясының академигі Мұрат Мансұров.
    Айта кетейік, атақты мүсінші Мұрат Амангелдіұлы Астана қаласындағы «Қазақ елі», «Керей мен Жәнібек», «Мәңгілік Ел», «Қазақ хандығына - 550 жыл» және тағы басқа да көптеген монументтердің авторы.