Жаңақорғанда күн электр станциясы іске қосылады
Жыл соңына дейін Жаңақорған ауданында қуаттылығы 10 мегаваттық күн электр станциясы іске қосылады. Өткен жылы Жалағаш және Шиелі аудандарында жалпы қуаттылығы 80 мегаватты құрайтын 2 күн электр станциялары пайдалануға берілді.Өңірлік коммуникациялар орталығында өткен брифингте облыстық энергетика және тұрғын үй-коммуналдық шаруашылық басқармасы басшысының орынбасары Ерлан Жоламанов осындай жағымды жаңалықты жеткізді.
– Біздің аймақ – күн сәулесі мол түсетін өңір. Оны ұтымды пайдалану мақсатында шағын елді мекендерде осындай жобалар жүзеге асырылды. Енді қуаттылығы мол станцияларға көңіл бөлінуде. Мәселен, ҚР Энергетика министрлігінің ұйымдастыруымен үстіміздегі жылғы 10 желтоқсанда өткізілген аукциондық сатылымның нәтижесімен «Хевел Қазақстан» компаниясы жеңімпаз болып анықталып, Арал қаласында қуаттылығы 20 мегаваттық күн электр станциясы салынады. Бұл өңірдің электр энергиясына деген тәуелділікті азайтады, – деді басқарма басшысының орынбасары.
Оның айтуынша, сондай-ақ, 2020-2021 жылдарға арналған «Жұмыспен қамту Жол картасы» бағдарламасы аясында 6 әлеуметтік нысанның бу қазандықтары газға ауыстырылса, мемлекеттік-жекешелік әріптестік аясында 13 әлеуметтік нысан «көгілдір отынға» қосылды. Бұл мемлекет қаржысын үнемдеуге мүмкіндік береді.
