Қызылорда облысы инвестициялар өсімі бойынша үздік өңірлер қатарында
Былтыр Қызылорда облысына 400 млрд. теңгеден астам инвестиция салынды. Бұл 2018 жылға қарағанда 17,4 пайызға артық. Инвестициялар өсімінің қарқыны бойынша жоғары өсу динамикасы бар үздік 4 өңірдің қатарында, – деп хабарлайды kyzylorda-news.kz. Бұл туралы облыс әкімі Қуанышбек Ысқақов халыққа есеп беру жиынында мәлімдеді.«Бұл – біз бен сіздің бірлескен жұмысымыздың нәтижесі. Өсім мемлекет бюджеті қаражатының есебінен емес, кәсіпорындардың өз қаражатының негізгі капиталына салымдардың өсуі есебінен (26%-ға) қамтамасыз етілді. Бүгінде барлық инвестициялардың 80 пайызы солардың үлесінде», – деді аймақ басшысы.
Инвестициялардың өсуімен облыстағы құрылыс жұмыстары 54 пайызға (146 млрд. теңге), тұрғын үйді пайдалануға беру көлемі 8,8 пайызға артып отыр. Өткен жылы өңірде 760 мың шаршы метр тұрғын үй көлемі пайдалануға берілген.
