Шағын археологиялық қазба жұмысы қала­шықтың орталық бөлігінде жүргізіліп, үлкен үйдің 2 бөлмесі ашылып, бұлардың шаруашылық бөлмелері болғандығы анықталды. Сондай-ақ шағын археологиялық қазба жұмысының нәтижесінде табылған артефактілерге лабо­раториялық зерттеу жұмыстары жүргізіліп, нысанның хронологиялық уақыты анықталды. Асанас-3 нысанынан табылған монета мен кера­микалық ыдыс сынықтары, археолог ғалымдардың пікірінше, шамамен Алтын орда дәуіріне тұспа-тұс келеді. Ал үлкен Асанас маңында көбіне мекен еткен тайпалық қауым жергілікті оғыздар болғандығын білеміз. Асанас-3 үлкен Асанас қалашығынан шамамен 3-4 шақырым жерде орналасқан және осы орайда орналасқан жер аумағымен тарихы тығыз байланысты нысандар болғандығын көре аламыз. Сонымен қатар Асанас-3 нысанының астыңғы мәдени қабаты жоқ тек бір қабаттан тұратыны зерттелді. Нысанның өз заманында белгілі бір тұрақтайтын шаруашылық үйі болғандығы және де суфа мен бөлме қабырғалары, еден орны табылып отыр. Сонымен қатар кіші мал сүйектері, астық сақтайтын орын, және қос тандыр пеші бар. Нысанның аймағы белгілі бір қоршаумен қорғалған, арнайы орындарды байқауымызға болады. Осы тұста бұл жер өз заманында бекініс орны немесе әскери қоныс орны болуы мүмкін деген де тұжырымдамалар бар. Шағын археологиялық қазба зерттеу жұмыстарынан кейін, нысанды табиғи құбылыстардан, яғни жауын-шашын, қар суы эрозияларынан сақтау барысында қайта көміліп, рекультивация әдісі қолданылды.

Үлкен Асанас қалашығы жайлы айта кетсек, тарихы терең Ұлы Жібек жолының бойын­да орналасқан экономикалық ірі сауда орны болғанын және өз заманында сақ, ғұн, жергілікті оғыз тайпаларының мекен еткенін білеміз. Осы жерлерде ең алғашқы ірі зерттеулер, 1946-1961 жылдары өткізілді. С.П.Толстов басқарған Хорезм археологиялық этнографиялық экспедициясы археологиялық зерттеу жұмысының нәтижиесінде қалашықты жергілікті оғыз тайпаларының мекендегенін айтады. Бұдан бөлек Хорезм археологиялық отряды Н.Вактурская 1968 жылдары Іңкәр­дария мен Жаңадария өзендерінің ескі арна­­ларындағы ортағасырлық қоныстарды зерттеген болатын. Осы тұста қалашыққа қималық-стратиграфиялық қазба түсіп зерт­теу жүргізіледі. Сондай-ақ 2002 жылы Қорқыт ата атындағы Қызылорда мемлекеттік уни­вер­ситетінің аға оқытушысы Т.Мәмидің жетек­шілігімен археологиялық қазба жұмыс­тары жүргізілді. 2020 жылы Қорқыт ата атын­дағы университетінің «археология және этнография» ғылыми зерттеу орталығымен ескерткіште кешенді археологиялық қазба жұмыстары қайта жанданды.

Үлкен Асанас қалашығының маңында орна­ласқан Асанас-3 нысаны осы зерттеулердің жал­ға­сы десек, қателеспейміз. Асанас-3 қала­­шығы­на алғашқы кіші мерзімде жүр­гізілген шағын археологиялық қазба зерттеу жұмыстарының нәтижесінде әлі де толық зерттеу жұмыстары қажет екендігі анықталды. Осы археологиялық қазба жұмыстарына Қызылорда облыстық тарихи-өлкетану музейі­нің ұйымдастыруымен Сырдария, Жала­ғаш, Қа­залы музейлерінің қызметкерлері қатысты. Экспедиция кезінде қалашыққа жақын маңда орна­ласқан, зерттеуді қажет ететін орта­ғасырлық нысандар табылды. Қазіргі таңда алын­­ған ғылыми мәліметтер өңделіп, ғылыми айналымға енгізілді.