ХХІҮ Қысқы Олимпиадаға санаулы күндер қалды

2022 жылы спортсүйер қа­­уымды бірқатар қызық кү­тіп тұр. Солардың бірі – Қыс­қы Олимпиада ойындары. Биылғы Олимпиада алауы Қытай астанасы Пекин қа­ласында жағылады. ХХІҮ Қысқы Олимпиада ойындары 4 ақпанда басталып, 20 ақ­панға дейін созылады.

Әлем бойынша қысқы Олимпиа­­да ойындары 1924 жылдан бері өткі­зіліп келеді. 1994 жылдан бастап қыс­қы ойынның өту мерзімі жазғымен салыс­тырғанда екі жылға алға жылжыды. Қыс­қы спорттық ойындар тарихына көз жүгіртсек, қазақстандықтар үшін табысты бола қоймағанын байқаймыз. Жалпы, қысқы сайыс кезінде Қазақстан сегіз медаль алса, оның төртеуін 1994 және 1998 жылдары Владимир Смирнов қоржынға салған.

Ресми деректерге сүйенсек, Қытай қысқы олимпиада ойындарына қызу дайындық үстінде. Биылғы байрақты бәсеке «Together for a Shared Future», яғни «Ортақ болашақ үшін бірге» ұра­нымен өтетін болады. Сайыста спорт­тың 7 түрінен, 15 спорттық пән бо­йынша барлығы 109 медаль сарапқа салынады. Дүбірлі додаға кәсіпқой жә­не әуесқой мамандар қатысып, бақтарын сынайды.

Бейжіңде өтетін бәсекеге қазақстан­дық спортшылар спорттың 8 түрінен 82 лицензия жеңіп алған. Спортшыларымыз шаңғы жарысы, трамплиннен секіру, шаңғы скандинавикалық аралас, фристайл (могул, акробатика), тау шаңғысы, шорт-трек, конькимен жүгіру сияқты спорт түрлерінен сайысқа тү­седі. Бүгінгі таңда олимпиадалық команда құрамына барлығы 32 спортшы енді.

Қысқы Олимпиада ойындарынан кейін Паролимпиада өтеді. Осы ретте, Мемлекет басшысы Қасым-Жомарт Тоқаев Қазақстанның ұлттық құрама­ларының мүшелерімен кездесіп, ел намысын қорғайтын байрақты бәсекеде спорт­шыларға сәттілік тіледі. Президент аталған спорттық сайыстардың ма­ңыздылығына тоқтала отырып, Қа­зақ­станнан қысқы олимпиадаға ең таң­дау­лы спорт­шылар аттанып жатқа­нын атап өтті.

Бейжің Олимпиадасында Қазақстан командасының Туын ұстаушылар да таңдалды. Бұндай маңызды жауапкер­шілік шорт-тректен Қазақстан коман­дасының көшбасшысы, әлем кубогі ке­зеңдерінің жеңімпазы әрі жүлдегер Абзал Әжіғалиев пен конькимен жүгі­руден төрт құрлық чемпионы Екатерина Айдоваға тапсырылды.

Сондай-ақ Ұлттық Олимпиадалық комитет 2022 жылғы дүбірлі додаға ар­налған Қазақстан командасының фор­­масын көпшілік назарына ұсынды. Олим­пиадалық құрамның формасы ал­ғаш рет «QAZAQSTAN» деген атаумен шығады.

Жарыс үш негізгі орталық – Яньцин, Чжанцзякоу және Бейжіңде өтеді. Қазақстандық құрама 27 қаңтарда «Air Astana» әуе компаниясының чартерлік рейсімен Hұp-Сұлтан қаласынан шығып, Алматы қаласына аялдап, Қытайға жол тартады. Айта кетейік, коронави­рус індетіне байланысты қауіпсіздік шаралары сақталып, спортшылардың ден­сау­лығы қатаң бақылауда болады.

Аружан МҰХАНБЕТҚАЛИ