Бұл ретте Мемлекет басшысы осы жылдың 15 наурызында республикалық референдум өткiзу туралы Жарлыққа қол қойды. Комиссия түрлі сала өкілдерінен құралған 130 адамнан тұрғанын ескерсек, жаңа Ата Заңның жобасын дайындауда асқан ыждағаттылық керек болды. Мемлекет басшысы Конституциялық комиссияның өте ауқымды әрі маңызды жұмыс атқарғанын атап өтті. Президенттің пікірінше, жаңа Конституция ережелері мемлекетіміздің институционалдық негізін трансформациялау үдерісі толығымен аяқталып, мүлде жаңа конституциялық үлгіге көшетінін көрсетеді. Ел Президенті маңызды жұмысты кәсіби тұрғыда атқарған Конституциялық комиссия мүшелеріне ризашылығын білдірді. Сондай-ақ Комиссия мүшелерінің жаңа Конституция жобасын тікелей эфирде талқылауы қоғамдық диалогтің жоғары деңгейін танытқанына назар аударды.

Бүгінде республикалық референдум өткізуге байланысты дайындық қызу жүруде. Қоғам тарапынан айтарлықтай қызығушылық оянып, азаматтық белсенділіктің жоғары деңгейі айқындала түсті. Шын мәнінде, Ата Заңның құрылымы билік институттары арасындағы тепе-теңдікті қамтамасыз еткенін аңғара аламыз.

Айта кетейік, елордада еліміздің жетекші қоғамдық-саяси күштері «Әділетті және Прогрессивті Қазақстанның Халықтық Конституциясы үшін!» атты Жалпыұлттық коалицияға бірікті. Оның құрамына бес жетекші саяси партияның өкілдері мен миллиондаған азаматтың мүддесін білдіретін 300-ден астам қоғамдық ұйым енген еді.

Жуырда Коалиция мүшелері өңірлерде түсіндіру жұмысын бастайды. Алдағы референдум қарсаңында ашық диалог пен азаматтардың саналы түрде қатысуын қам­тамасыз ету мақсатында еңбек ұжым­дарымен, сарапшылар қауымымен және тұрғындармен кездесу өткізу жоспарланып отыру.