Қыз жауабы...
Ертеректе бір бай парықсыздау, ерке-шора жалғыз ұлына жақын маңдағы елде тұратын әке-шешесінің тұрмысы жұтаңдау болса да ақыл-парасаты мол, сөзге шешен, тауып сөйлейтін тапқыр қызды келін етіп алғысы келетінін айтып, «танысып қайт, сөйлегенде аңдап сөйлесерсің» деп жібереді. Жігіт әке тапсырмасымен қыз үйінің тұсына келіп, дыбыс береді. Үйінде әке-шешесі жоқ, кесте тігіп отырған қыз жігітке: – Атыңызды қысқа немесе жазға байлап үйге кіріңіз, – деп өтінеді. Сөздің мәніне түсінбеген жігіт атын үйдің белдеуіне байлап үйге еніп, жайғаса бере:– Қарындас асығыс едім, қымыз әкелсең болады, – деп ас әзірлемек болып жатқан қызға тіл қатады.
– Мырза, ол айтқаныңыз құмды жерде емес, қатты жерде болады ғой, – дейді. Әрі қарай не сөйлерін білмей сасқалақтаған жігіт:
– Әкең қайда? – деп сұрайды. Ас-суды қамдап жүрген қыз:
– Әкем сегіз аяқтыға мініп, бір зеңгіні іздеп кеткен еді, – деп жауап беріпті.
Әрі қарай сөздің ретін таба алмаған жігіт еңсесі түсіп, еліне келеді. Әкесі барған жердің хабарын сұрағанда жігіт өз сөзімен қыз жауабын жеткізеді. Сонда жігіттің әкесі:
– Шырағым, ескертуімнен еш нәтиже шығармапсың. Қыз саған берген жауабында «Атыңды арбаға байла, қымыз байда болады, әкем буаз биемен кетті» дегенін түсінбеген екенсің, – деп күйінген екен.
Жәнібек МАХАНБЕТ,
өлкетанушы
А.Тоқмағамбетов ауылы
өлкетанушы
А.Тоқмағамбетов ауылы
