Айта кетейік, Қызылорда облысы әкімдігінің әлеуметтік желідегі ресми парақшасындағы мәліметке сүйенсек, Конституцияға өзгерістер енгізуге байланысты референдумда Қызылорда облысы тұрғындарының 93,04 %-ы дауыс беріп, республикада бірінші орынға шықты. Маңызды саяси науқанда қазақстандықтардың 73,24%-ы өз таңдауын жасаған. Орталық референдум комиссиясының мәліметінше, сағат 20:00-дегі жағдай бойынша 9 126 850 азамат дауыс берді.

Еске салайық, облыс бойынша 378 референдум учаскесі қызмет етті. Дауыс берушілерге ыңғайлы болу үшін 179 онлайн сервис, уақытша тіркеу қызметін атқаратын 5 онлайн учаске іске қосылды. Азаматтар өз учаскесін 4 платформа арқылы анықтады. «Smart Qyzylorda» мобильді қосымшасындағы https://referendum.orda.gov.kz сайты және арнайы телеграмм боты үздіксіз жұмыс істеді. Азаматтар сайтқа кіріп, өз учаскесі, референдум комис­сиясының мекен-жайы, байланыс дерек­тері және комиссия мүшелерінің құрамы туралы ақпарат алды. Сондай-ақ 109 қызметінің диспетчерлері де сауалдарға жауап берді.

Сыр халқы референдумға белсенді қатысып, азаматтық жауапкершіліктің жоғары деңгейін көрсетті. Дауыс беруге келген адамдардың саны көп болып, өңір республика бойынша алдыңғы қатардан көрінгені – ауызбіршіліктің үлгісі. Бұл халықтың ел болашағына бей-жай қарамайтынын дәлелдейді. Референдум кезінде сайлау учаскелері талапқа сай ұйымдастырылып, тұр­ғындардың еркін дауыс беруіне барлық жағдай жасалды. Жастар да, үлкен буын өкілдері де өз құқықтарын пайдаланып, маңызды шешім қабылдауға атсалысты.

Қорыта айтқанда, Сыр өңірінің тұрғындары референдумда жа­уап­кер­шілік танытып, елдің саяси өмі­ріне ыждағаттылықпен қарайтынын көр­сетті. Бұл өңірдің қоғамдық-саяси тұрғыдан да көшбасшылар қатарында екенін дәлелдейді.