Құрылысшыларға құрмет
Құрылыс саласы – ел экономикасының маңызды секторларының бірі. Еліміздің, оның ішінде ауданымыздың жаңарып, жасаруында аталған сала мен сала мамандарының еңбегі өлшеусіз. Тамыз айындағы кәсіби мерекелердің бірі – құрылысшылар күні. Атаулы күн қарсаңында аудан әкімі сала мамандары мен ардагерлерін қабылдап, сый-құрмет көрсетті.– Мемлекет басшысы Қасым-Жомарт Кемелұлы Тоқаевтың қолдауымен, аймақ басшысы Нұрлыбек Машбекұлы Нәлібаевтың тапсырмасымен өңірде ауқымды жобалар жүзеге асырылуда.
Ауданда да құрылыс қарқыны бәсеңдеген жоқ. 2025 жылдың І жартыжылдығында құрылыс жұмыстары 44,4 пайызға артып, көлемі 12,6 млрд теңгені құрады. Пайдалануға берілген тұрғын үй көлемі 10 225 шаршы метрді құрап, өткен жылдың тиісті кезеңімен салыстырғанда 7,2 пайызға артық орындалды. Өткен жылы облыстық бюджеттен 2,1 млрд теңге қаржы бөлініп, аудан орталығында халықтың әлеуметтік осал топтарына 144 пәтердің кілті табысталды. Аудан орталығында биыл «Руханият» орталығы бой көтеріп, пайдалануға берілді. Бүгінде Шаған ауылындағы дәрігерлік амбулатория, Сәкен Сейфуллин ауылындағы №137 орта мектеп ғимараты күрделі жөндеуден өткізілуде.
Құрылыс – адамзат баласы жер бетінде пайда болған ежелгі дәуірден бастап дамып келе жатқан жасампаз кәсіп. Бұл салада еңбегі адал, қабілетті мамандар жұмыс істейді. Құрышқол құрылысшылар күннің ыстық-суығына қарамай атқарған адал еңбектерінің арқасында халқымызды қуанышқа кенелтіп, елдің сәулетіне сәулет қосуда. Сіздерді кәсіби мерекелеріңізбен құттықтап, ұзақ ғұмыр, зор денсаулық, отбасыларыңызға амандық, еңбектеріңізге толағай табыс тілеймін! – деді аудан әкімі Берік Сәрменбаев.
Мерекелік іс-шарада ауданымыздың өсіп-өркендеуіне, әлеуметтік нысандардың бой көтеруіне ерекше атсалысқан азаматтарға, майталман мамандарға «Құттықтау» табысталды.
Өз кезегінде аудандық ардагерлер кеңесінің төрағасы Мұса Келдібаев, құрылыс саласының ардагерлері Құдайберген Шыманов пен Нәзтай Тілемісова мерекелік лебізін білдіріп, іс-шараны ұйымдастырушыларға ризашылығын жеткізді.
«Тт» ақпарат
