Иисус туған сәтте аспанда ерекше сәбидің дүниеге келгенін паш еткендей жарық бір жұлдыз пайда болды деседі. Сондықтан да осы түні дінге сенушілер шіркеуге барып, дұғасын оқып, сол бір жарық жұлдыздың көрінуін күтеді. Бұл мейрамда барша христиандар бір-бірін құттықтап, жылы сөздерін, игі тілектерін арнап жатады.

Сондай-ақ бұл күні әлемде түрлі тарихи оқиғалар орын алған. Атап айтар болсақ, 1610 жылы итальян ғалымы Галилео Галилей Юпитердің төрт серігін тапқан. Ал 1714 жылы британдық Генри Милль баспа машинасын патенттеді. 1928 жылы «Кукурузник» ұшағы алғаш рет ұшырылса, 1953 жылы АҚШ президенті Гарри Трумэн Америка Құрама Штаттарының сутек бомбасы бар екенін мәлім етті.

Ал Қазақстанда бұл күн қандай тарихи оқиғалармен есте қалады? 7 қаңтарда 1992 жылы Француз Рес­публикасы Қазақстанның тәуел­сіздігін мойындады. 1992 жылы Қазақстанның мемлекеттiк қой­масына асыл металдардың бiрiншi партиясы қабылданды. Ал 2003 жылы «Электрондық құжат және электрондық сандық қол қою туралы» заң жарық көрді. 2010 жылы Францияның алдыңғы қа­тар­лы «L'Essentiel des relations internationales» сыртқы саяси және сараптамалық журналы «Қазақстан – Еуропаның болашағы ма?» деген атаумен Қазақстан туралы 100 беттік қызықты репортаж жариялады.

Сонымен қатар әр жылдары дәл осы күні елімізде қазақтың атақты әншісі, Қазақстанның халық әртісі, режиссер, КСРО Мемлекеттік сыйлығының иегері Құрманбек Жандарбеков, химия ғылымының кандидаты, профессор, Халықаралық шығармашылық академиясының ака­демигі Шайсұлтан Шаяхметов, қазақтың 2-ші, ал әлемнің 309-шы ғарышкері, Қазақстанның Халық Қаһарманы, Ресей Федерациясының Қаһарманы, техника ғылымдарының докторы, авиация генерал-лейтенанты Талғат Мұсабаев дүниеге келген.