Мерейлі отбасы – ұлттың байлығы
Елімізде ырысы мен ынтымағы жарасып, ауызбіршілігімен көпшілікке үлгі болған жанұяларды дәріптеу мақсатында жыл сайын «Мерейлі отбасы» сайысы өтеді. Әр жылы жоғары дәрежеде ұйымдастырылып келе жатқан сайыс биыл да жалғасын тапты. «Мерейлі отбасы – 2022» ұлттық байқауының аудандық кезеңі аяқталды. Аудан әкімі М.Ергешбаев «Мерейлі отбасы – 2022» ұлттық байқауының аудандық кезеңіндегі жеңімпаздарды марапаттау рәсіміне қатысып, жүлдегерлерді құттықтады.Отбасы құндылығы – қай заманда да, қай елде де мемлекет саясатының темірқазығы, ардақ тұтар қазынасы. Қоғамдағы әр отбасының босағасының беріктігі – мемлекет іргетасының мығым әрі кемелдігінің кепілі. Қазақ халқы қашанда отбасын қасиетті құрылым ретінде қабылдап, зор маңыз беріп, мәнін қорғаған. «Ел болам десең, бесігіңді түзе» деп отбасындағы ұрпақ тәрбиесінің маңызын айқындаған.
Берекелі отбасы – мықты мемлекеттің іргетасы. Отбасы беріктігін алдыңғы орынға қойып, жанұяның құндылығын насихаттайтын сайыс 2013 жылдан бері тұрақты түрде ұйымдастырылып келеді. Алдымен ауылдардан ұсынылған мерейі артқан жанұялар аудан бойынша іріктеу кезеңінен өтіп, облысқа жолдама алады. Биыл сегізінші рет ұйымдастырылған байқауға қатысуға өтініш берген отбасылар саны ауданымызда жыл өткен сайын артып келеді.
«Мерейлі отбасы – 2022» ұлттық байқауының аудандық кезеңінің қорытындысына сәйкес 5 отбасы жүлдегер атанды. Іңкәрдария ауылынан қатысқан Есдәулетовтер отбасы мен Аманкелді ауылының Құдайбергеновтер отбасы жүлделі үшінші орынды жеңіп алса, С.Сейфуллин ауылынан қатысқан Есекеевтер отбасы екінші орынды қанжығаға байлады. Шаған ауылынан қатысқан Сарыбаевтар отбасы бірінші орынмен марапатталса, бас жүлде Шіркейлі ауылының өнегелі жандары Есенхожаевтар отбасына бұйырды. Сондай-ақ 13 отбасы арнайы «Алғыс хатпен» марапатталды. Аталған іс-шараға қатысу үшін аудан орталығы мен елді мекендердегі 20-ға жуық отбасы өтініш білдірген. Жеңімпаздарды құттықтап, сайыстың мәні мен маңызына тоқталған аудан басшысы:
– Қоғамда осындай рухани-әлеуметтік діңгегі берік отбасылық құндылықтарды тереңдету мақсатында 2013 жылдан бері «Мерейлі отбасы» байқауы өткізіліп келеді. Бұл – мазмұны мен тәрбиелік жағынан өзгеше іс-шара. Яғни аға буынға «Артымда қандай ұрпақ қалдырамын?» деген ой салып, жас буынды әке салған жолды жай ғана жалғастырып қоймай, тың идеялармен байытып, жаңаша қарқынмен жетілдіруге жетелейтін, рухани байытатын «Мерейлі отбасының» мәні тереңде жатыр. Бұл ұлттық конкурс ұрпақтар сабақтастығын жария етіп, елге қызмет етудің ең озық үлгілерін көрсетіп, өнеге алатын сайыс болуымен де қоғам алдындағы құндылығы арта түспек, – деді құттықтауында.
Айта кетейік, аудандық кезеңнен топ жарған отбасылар облыстық, одан кейін республикалық кезеңге жолдама алады. Ауданнан байқаудың облыстық кезеңіне жолдама алған Шіркейлі ауылының берекесі мен бірлігі жарасқан Есенхожаевтар отбасы мен Шаған ауылының көпке үлгі болған Сарыбаевтар отбасына сәттілік тілейміз.
Аружан МҰХАНБЕТҚАЛИ
