Сапалы «пескоблок» іздесеңіз..

Күн жылысымен-ақ құрылыс қарқын алатыны белгілі. Тұрғындардың бірі жаңа үй көтерсе, енді бірі сарай, гараж басқа да нысан салуды қолға алады. Тіпті тұрғын үйді кеңейтіп, бөлмелер қосатындар да жоқ емес. Міне, осы уақытта көпшіліктің құрылыс материалдарына, оның ішінде қыш, кесекке деген сұранысы артады. Ал осындайда қыш өндіріп, кесек құюды кәсіп еткендердің жұмысы қызады.

Бүгінде үлкен көлемдегі қыш (пескоблок) сұранысқа ие. Өйткені аталған қышпен кез келген ғимарат жылдам бой көтереді. Сондықтан да бүгінде осыны кәсіп көзіне айналдырушылар қатары жетерлік. Олардың қатарында мұ­ны отбасылық бизнеске айналдырған ЖК «Рсбаева» да бар.

Бұл жұмыстарды үйлестіруші Жұмабек Ембергенов аталған кәсіпті өткен жылдан бастап қолға алған. Ол үшін аудан орталығындағы бұрынғы пластик терезелер шығаратын за­уыт ғимаратын алып, оны осы кәсіпке лайық­тандырған. Үлкен көлемдегі қыш құятын арнайы қалып, цемент пен тас араластыратын станок және басқа да құрал-жабдықтарды сатып алған. Содан соң 5 адамды жұмыспен қам­тып, өткен жылдың мамырынан бастап пескоблок құйыла бастаған.

– Тереңөзек кенті Ғ.Мұратбаев тұйығы кө­ше­сіндегі бұрынғы пластик терезе шыға­ратын зауыт ғимаратын сатып алдық. Содан осы кәсіпті бастауға ниеттеніп, қажетті жұ­мыс­тарды жүргіздік. Біз өткен жылы айына 6-7 мың дана үлкен көлемдегі қыш құйдық. Оны көршілес Жалағаш ауданынан, сондай-ақ Тереңөзек кенті мен Шаған, А.Тоқмағамбетов, С.Сей­фуллин, Қалжан ахун ауылдарының тұр­ғындары алды. Көбіне жақын жер бол­ған соң кент тұрғындары 1000-2000 данадан сатып алды. Кәсібіміз алға басқан соң биыл бұл жұмысты ерте бастап отырмыз, – дейді Ж.Ем­бер­генов.

Пескоблокқа қазірдің өзінде сұраныс артып отыр. Сондықтан бүгінгі таңда күніне 500 дана қыш құйылуда. Ал осы жұмыстардың жылдам жүруі үшін жүк тиегіш техникасы сатып алынған. Кәсіп иесі мұның көмегі көп екенін айтады. Қиыршық тасты, үлкен қаппен алынған цементті арнайы станокқа дейін жет­кізіп беру жұмысы осы жүк тиегіш техника ар­қылы жеңілдеген.

– Қазір кәсіпкерлікті дамыту басты назарда тұр. Қолдан келетін кәсібімізді өркендету жолында еңбектеніп келеміз. Алдағы жоспарымызда күніне 2000 данаға дейін шығаратын арнайы станок алу бар. Осы құрылыс науқанында көпшілік сұранысын қамтамасыз етіп, тағы да жергілікті тұрғындарды жұмыспен қамтитын боламыз. Тағы бір айта кететіні, бізден пескоблок сатып алған тұрғындарға жеткізіп беруде жеңілдіктер қарастырылған. Үлкен көлемдегі қыштың 1 данасы 250 теңгеден сатылуда, – дей­­­ді отбасылық кәсіпті жүргізіп отырған кәсіп­кер.

Кәсіп иесінен қыш алған тұрғындар құры­лыс материалының сапасына өздерінің риза­шы­лығын білдіруде.

– Өткен жылы есік алдында құрылыс жұ­мыстарын жүргізуге пескоблок іздедім. Қа­зір көпшілігі құрылысты осымен салады. Із­дегенім жақыннан табылды. Енді құй­ып бас­тап жатыр екен, 2000 данаға тапсырыс бер­дім. Тез арада құйып, кәсіпкердің алғаш­қы тұтынушысы болдым. Пескоблок сапасы жақсы. Соның арқасында есік алдындағы құ­ры­лыс жұмыстарын бітіріп алдым, – дейді кент тұрғыны А.Аймышев.

Расында, көктем басталысымен құрылыс жұ­мыстары қарқынды жүргізіледі. Осындай уақытта қажетті құрылыс материалдары болмай қалса, ойлаған жұмысың бітпей қала­ды. Ал сапалы құрылыс материалдары дер ке­зін­­­­де дайын болса, күн суымай құрылысты біті­­ріп, ойдағы ісің орындалады. Бұл ретте сапаға мән беретін Ж.Ембергенов кез келген тұрғынның сұраны­сын қамтамасыз ету бағытында кәсібін кеңейте бермек. Сапалы пескоблок іздесеңіз, алысқа барудың керегі жоқ.

Ердос БЕРКІНБАЕВ