Жол-көлік оқиғасы: Заңға бағынбағандар жазаланады

Құқық қорғау саласының мамандары жол-көлік оқиғасына байланысты түйткілді мәселелерді назарға алып келеді. Аудандық прокуратура мен аудандық полиция бөлімі бірлескен түрде тиісті іс-шараларды жүзеге асыруда. Мәселен, 2021 жыл­дың 6 айында жол көлік оқиғасы өткен жылмен салыстырғанда 10-нан 13-ке, жарақат алғандар 12-ден 22-ге өсім алса, қаза тапқандар саны 7-НІ құрап отыр. Осындай келеңсіз оқиғаларды болдырмау үшін арнайы жобалар қолға алынған.

Кейінгі жылдары жол-көлік оқиғасы салдарынан адам өміріне қауіп күшейе түскен. Темір тұлпарды тізгіндеген азаматтардың бейбере­кет әрекетінен қайғылы жағдайлар орын алуда. Сондықтан аудандық полиция бөлімі жол апаттылығына тікелей септігін тигізетін жол қозғалысы ережесін бұзушыларды анықтау мақсатында 4 рет «Қауіпсіз жол», 1 рет «Автобус», 6 рет «Құқық тәртібі», «Жолда қа­былдау» акцияларын ұйымдастырған. Негізінен, есепті мерзімде аудандық полиция бөлімінің жергілікті полиция бөлімшесінің патрульдік полиция тобының қызметкерлері арнайы Заңға сәйкес, аудандық прокуратура органдарының рейдтік іс-шарасы нәтижесінде, көлік құралын алкогольдік масаң күйде басқару бойынша 12 дерек анықтаған.

Айта кету керек, 14-19 шілде аралығында облыс көлемінде «Қауіпсіз жол» жедел-профилактикалық іс-шарасы өткізілуде.

– Жедел-профилактикалық іс-шара барысында тәртіп сақшылары қоғамдық тәртіпті сақтау, жол қозғалысы қауіпсіздігін қамтамасыз ету, жол-көлік оқиғаларын алдын алу, бекітілген ережелерді өрескел бұзбауды қадағалайды. Өз кезегінде аудандық прокуратура жекелеген тұлғалардың қатысуымен орын алатын құқық бұзушылықтарға бақылау жүргізеді. Қазіргі таңда заң шеңберінде жол-көлік оқиғасын тежеу үшін көлік иелеріне түсіндірме жұмыстары тұрақты ұйымдастырылады. Оның ішінде, жолаушы тасымалымен айналысатын автобус және такси жүргізушілеріне талапқа сай ережені қатаң сақтау керектігі ескертіледі, – дейді Сырдария аудандық прокуратурасының прокуроры Д.Ұзақбаев.

Жыл басынан бері аудандық полиция бөлімінің мамандары бірнеше бағыттағы іс-шаралар негізінде заң бұзушылықтар анықтаған. Алдағы уақытта жол қозғалысын реттеу бойынша жоспарлы жұмыстар атқарылмақ.

Балтабай Аябекұлы