Мейрамда туған Мейрамбек

Бұл – біздің Мейрамбек! Кәдімгі Мейрамбек Шілдебаев! Бір топта оқыдық. Бір бөлмеде тұрдық. Сексенінші жылдарда КазГУ-дің ас-суын ішкендер оны жақсы біледі. Бір көрген адамның өмірі есінен шықпайтындай ерекше түр-сипат, бөлекше кескін-келбет... Лақап аты - Максим Горький. Шашы шөмеледей, мұрты таудай, түсі суық, жүрісі суыт, бірақ аса ақкөңіл жігіттің айналасына сүйкімі болды. Әсіресе, тентектерді тепкілеуден танбайтын тегеурінді деканымыз Темірбек Қожакеевтің өзі оны өте жақсы көрді. Мезгілсіз жортатын мұртты Миша түрлі себептерге байланысты талай рет жатақханадан шығып кетсе де, ешкімге жіби қоймайтын қатал декан оған мейірімі түсіп, қайта-қайта орын беретін.Сірә, Мейрамбектің білімі мен білігіне, өрлігі мен серілігіне сүйсініп, қисықтығы мен қыңырлығына көз жұма қарайды-ау деймін. Тіпті бірде біздің Мишекең Темкеңе әбден еркінсіп, "Маған жатақханадан орын бермей-ақ қойыңызшы, бәрібір шығып кетем", – дегені бар.

Сол Мейрамбек журфакты бітіргеннен бері өзінің Тереңөзегінен табан ажыратқан жоқ. Ұзақ жыл аудандық газетте қызмет істеді, облыстық басылымның меншікті тілшісі болды. Жұмысына адал, ісіне тиянақты. Ана бір жылы тасқын кезінде Сырдарияның ағысын барлауға аттанған тікұшақтан құлап, біраз зардап шекті. Көп жыл тəн азабын да, жан азабын да тартудай-ақ тартты. Бірақ қиындыққа қайыспады. Төсек тартып жатса да, қаламын қаңтармады. Қысқасы, сырқаты жанына батса да, журналистиканың туын жыққан жоқ. Саптан шықпады. Сыннан ықпады. Несі бар, аса талантты жігіттер жергілікті басылымға да керек қой...

1 мамыр – мейрамда дүние есігін ашқан Мейрамбектің туған күні. Кеше осыған орай Сыр бойы ақпарат құралдарының өкілдері оған біршама құрмет көрсетті. Әріптестерімізге рахмет айтамыз! Мейрамбек досымызды қат-қабат келген мерекелерімен құттықтаймыз!

Бауыржан ОМАРҰЛЫНЫҢ "Фейсбук" әлеуметтік желісіндегі жеке парақшасынан алынды