Ауылдың даму серпінін жоғары бағалады
Жақында ҚР Парламенті Сенатының депутаттары Сыр еліне іссапармен келді. Ең алдымен облыс әкімі Н.Нәлібаев ҚР Парламенті Сенаты Қаржы және бюджет комитеті депутаттарын қабылдады. Одан соң Парламент Сенаты Қаржы және бюджет комитетінің көшпелі отырысы өтіп, онда жаңартылған заңнама талаптарына сәйкес бюджет процесін іске асыру мәселелері талқыланды.
Отырысқа Парламент Сенаты Қаржы және бюджет комитетінің төрағасы Сұлтанбек Мәкежанов, Ұлттық экономика министрлігі бюджет саясаты департаментінің директоры Гульором Муллабаева, Қаржы министрлігі бюджеттік жоспарлау департаментінің директоры Сейілхан Исмағұлов қатысты.
Аймақ басшысы Президент тапсырмасында нақтыланған бюджет қаражатын ұтымды жоспарлау мен тиімді игеру міндетін атап өтті.
«Мемлекет басшымыз Қасым-Жомарт Кемелұлы бюджет қаржысын тиімді жоспарлау, мақсатқа сай бөлу мен игеру жөнінде міндеттер жүктегені белгілі. Облыс бюджетінен әлеуметтік салаға 2023-2025 жылдары бөлінген қаражаттың мақсатты жұмсалуына жүргізілген зерделеу, бақылау шараларының нәтижесінде 100 млрд теңгеге жуық қаржы үнемделді. Оның ішінде білім саласынан 58 млрд 600 млн теңге, «Арт спорт» бағдарламасынан 13 млрд 100 млн теңге, әлеуметтік қорғау саласынан 8 млрд 200 млн теңге үнемделіп, бюджет қазынасында қалды. Жаңадан жүзеге асырылатын инвестициялық жобаларға құжаттама әзірлеуге демеушілер есебінен 7 млрд теңге бөлінді. Барлық 7 ауданда «Руханият орталықтарын» салып, бұған дейін әр жерде орналасқан мекемелерді бір орталыққа біріктірдік. Бұл ғимараттарды ұстап тұру шығындарын қысқартуға жол ашты. Мектептерге қосымша ғимараттар салу арқылы үш ауысымдық оқу мәселесін түбегейлі шешіп, жаңа мектеп салуға қажеттіліктің алдын алдық. Осылайша, бюджетке түсетін салмақ азайтылып, 13 млрд 100 млн теңге оңтайландырылды» деді Нұрлыбек Машбекұлы.
Сенаторлар сапары одан әрі облыстың жаңа өндіріс орындарымен танысумен жалғасты. Өз кезегінде құрметті қонақтар «Қызылорда-Нан» ЖШС, «Қызылорда САЗ-М» ЖШС, кірпіш зауыты, жаңа жылу электр орталығы және жаңа стадионмен таныстырылды.
Келесі күні қайта жаңғырудан өткен «Қорқыт ата» кітабының 1300 жылдығына арналған ескерткішпен танысып, «Таза Қазақстан» республикалық экологиялық акциясына қатысқан ҚР Парламенті Сенаты депутаттарының сапары Сырдария ауданына қарасты Бесарық және Нағи Ілиясов ауылдарында жалғасты. Ең алдымен Бесарық ауылындағы нысандармен, ауылдың даму барысымен танысқан құрметті қонақтар орталық алаңның абаттандыру жұмыстарына қанықты. Сондай-ақ шағын өндірістік орталық жұмысын жоғары бағалап, фри өндіру цехының жаңа заман талабына сай екенін атап өтті. Одан әрі «Адал адам» мәдени-тәрбие орталығы жұмысымен танысқан қонақтар республикадағы үлгілі ауыл атанған Нағи Ілиясов ауылының даму қарқынын өте жоғары бағалады. Ауылдағы Еңбекшілер аллеясы, орталық алаңның көзтартар сұлулығына пікір білдіріп, мәдениет үйінің жанданған жұмысына куә болды. Сонымен қатар ауыл балаларын спортқа баулып келе жатқан спорт кешені жұмысымен және дәрігерлік амбулатория жұмысымен таныстырылды. Өз кезегінде ҚР Парламенті Сенатының депутаттарын аудан әкімі Берік Әбдіғаппарұлы күтіп алып, қос ауылдың жай-күйімен таныстырды. Ал ҚР Парламенті Сенатының депутаттары Мемлекет басшысының тапсырмасына орай, осындай шағын ауылдарда ауыз толтырып айтарлық игі істердің атқарылып жатқанына ризашылығын білдіріп, ауылдардың даму серпінін жоғары бағалады.
А.МҰХАНБЕТҚАЛИ
