Қазақстанда ұлттық кино комиссиясы құрылады

Елімізде ұлттық кино комиссиясы құрылмақ. Бұл туралы ҚР Мәдениет және спорт министрлігі мәдениет комитеті төрағасының орынбасары Күміс Сейітова мәлім етті, деп хабарлайды ҚазАқпарат.

«Күні кеше Мемлекет басшысы «Қазақстан Республикасының кейбір заңнамалық актілеріне кинематография, мәдениет және мерекелер мәселелері бойынша өзгерістер мен толықтырулар енгізу туралы» заңға қол қойды. «Кинематография туралы» заң 2019 жылы қабылданды. Небәрі 3 жыл өтсе де, әлемдегі кинематография саласының қарқынды дамуын назарға алсақ, кинематография және мәдениет туралы заңды жетілдірудің қажеттілігі туындады», - деді Күміс Сейітова Орталық коммуникациялар қызметі алаңында өткен баспасөз мәслихатында.

Сондай-ақ министрлік өкілі отандық кинематографияға қатысты соңғы жаңалықпен бөлісті.

«Заңға енгізілген өзгерістер мен толықтырудың тағы бірі – елімізде ұлттық кино комиссиясын құру. Мақсат – халықаралық кино өндірісі үшін фильмдер түсіру алаңы ретінде Қазақстанның мүмкіндігін арттыру. Осы орайда халықаралық кинематография ұйымдарына қойылатын талаптар жеңілдетілді. Яғни еліміздің аумағын фильм түсіру локациясы ретінде қолдану қолжетімді бола түсті», - дейді ол.

Бұған дейін елімізде сахна әдебін сақтамаған әртістерге 477 мың теңгеден бастап, 6,3 млн теңгеге дейін айыппұл салу мәселесі қаралып жатқанын хабарлаған едік.