Биофармацевтикалық кешен салынады
Қазақстанда құны 103 млрд теңгені құрайтын толық циклді биофармацевтикалық кешен салынадыҚР Президентінің фармацевтика саласында отандық өндіріс үлесін 50%-ға жеткізу жөніндегі тапсырмасын орындау аясында елімізде ірі стратегиялық инвестициялық жоба іске асырылады. Тиісті қаулыға Премьер-министр Олжас Бектенов қол қойды.
Кешен дәрілік заттар өндірісінің озық технологияларымен жабдықталады. Жоба аясында 58 түрлі препарат шығаратын өндіріс қуатын құру, оның ішінде белсенді фармацевтикалық ингредиенттер өндіру көзделген.
Өндірістік портфельге 27 халықаралық патенттелмеген атауы бар, соның ішінде онкологиялық, аутоиммунды, сирек және қабыну ауруларын емдеуге арналған препараттар енеді.
Инвестициялардың жалпы көлемі 103 млрд теңгеден асады. Сондай-ақ кешенде 180-нен астам тұрақты жұмыс орны ашылады.
