Бірінші сыныпқа құжат қабылдау басталды
Көпшілік «Білімдіге дүние жарық, білімсіздің күні ғаріп» деп бекер айтпаса керек-ті. Халық баласын оқытуда ұстаздарға жүктелетін міндет көп. Бүгінде педагогтар қауымы келесі оқу жылына бірінші сынып оқушыларын қабылдау үшін құжат қабылдауды бастады.Жалпы, Сыр өңірінде 2022-2023 оқу жылында 19 568 оқушы қабылданады деп күтілуде. Білім ұясының табалдырығын алғаш аттайтын балғындар үлкен өмірге қадам басады.
Облыс көлемінде бірінші сынып оқушыларының құжаттары «электронды үкімет» веб порталы арқылы қабылданады. Өз кезегінде осы мәселеге қатысты сауалдарға облыстық білім басқармасының бөлім басшысы Нұрлан Дәулетәлиев Өңірлік коммуникациялар қызметінде өткен брифингте жауап берді.
– Мектепке 6 жасқа толған және биыл 6-ға толатын балалар қабылданады. Айта кету керек, баланың жасы 1 қыркүйекте толық 6 жаста болса ғана қабылданады. Ал баланың жасы жетпесе тек ата-анасы немесе заңды тұлғалары қалаған жағдайда мектепке бару мүмкіншілігі бар. Ережеге сәйкес 1-сыныпқа қабылдау кезінде алдымен қызмет көрсету аумағынан өтініш білдірген 3 үміткер, содан кейін басқа аумақтан 1 үміткер қабылданады. Білім беру ұйымдары міндетті көрсетілген тізбеден тыс құжаттарды тапсыруды өтініш берушіден талап етуге құқығы жоқ. Сонымен қатар мектепке қабылдану үшін ешқандай емтихан тапсырылмайды, – деді Нұрлан Дәулетәлиев.
Қырық мыңға жуық аудан халқының демографиялық өсімі жоғарылау үстінде. Келесі оқу жылында 2015-2016 жылы туылған балалар білім нәрімен сусындайтын болады. №210 Оспан Әбілпаттаев атындағы орта мектептің 12 жыл жұмыс өтілі бар білікті ұстаз Ботакөз Баджанова 2022-2023 оқу жылында бірінші сыныпқа оқушы қабылдауға ниетті.
– Қазіргі таңда жаңартылған оқу бағдарламасы арқылы балалардың білім деңгейін көтеру маңызды. Әрине, бірінші сыныпқа қабылданатын оқушылардың алғашқы ұстазы ретінде зор жауапкершілік жүктеледі. Қашанда әрбір үйдің кішкентай балғындарымен жұмыс жасау қызықты әрі күрделі. Ата-аналардан балалардың құжаттарын қабылдау жүргізілуде. Бастауыш сыныпқа келген бүлдіршіндерге «Әліппені» үйретіп, білімді болуға баулимыз. Балаға берілген алғашқы білім дұрыс болса, кез келген ғылымды игеріп кете алады. Сондықтан ұстаздар үнемі ізденісте болады. Жаңаша леп әкеледі. Ата-анамен тығыз байланыс орнатып, бала қабілетін ашуға тырысамыз, – дейді білікті ұстаз.
