Негізінен, сталкинг ұғымы ХХ ғасырдың екінші жартысында қалыптаса бастаған. Әсіресе, АҚШ-та белең алған. Қоғамда адамды жүйелі түрде аңду, мазасын алу, қудалау жағдайлары жиілеген. Бүгін­де сталкинг – жеке өмірге қол сұғу, психо­ло­гиялық қысым көрсету, қауіп төндіретін әрекет ретінде бағаланады. Өткен жыл­дың шілде айында Мемлекет басшысы Қазақстан Республикасының Қылмыстық кодексіне жаңа 115-1-бап – «Сталкинг» енгізуді көздейтін заңға қол қойған болатын. Заңда сталкинг «адаммен байланыс орнатуға және (немесе) оның еркіне қайшы келетін, зорлық-зомбылықпен бай­­ла­ныс­ты емес, айтарлықтай зиян кел­тіретін әрекеттерде көрініс табатын адамды заңсыз қудалау» деп анықталады.

Қылмыстың өтеуі – жаза. Сталкинг салдарынан адам қаза тапқан жағдайда, қылмысы дәлелденген азамат темір торға тоғытылады. Ал адамның жеке өміріне қол сұғу орын алған жағдайда, күдікті 200 айлық есептік көрсеткішке дейін айып­пұл тө­леу не сол мөлшерде түзеу жұмыстары­на тарту, 200 сағатқа дейін қоғамдық жұмыстарға тарту немесе 50 тәулікке дейін қамауға алу түріндегі жазаға тартылады.

– Сырдария ауданында сталкингтің құр­баны болған жандар тіркелмеген. Де­генмен күнделікті жұмыс барысында тұрмыстық зорлық-зомбылыққа байланысты түсіндіру жұмыстарын тұрақты түрде жүргіземіз. Қолайсыз отбасылар­мен тікелей жұмыс жасап, қоғамда тыныш­тық орнатуға барымызды саламыз. Шын мә­нінде, адамның өміріне қол сұғу – ақтауға келмейтін қылмыс. Сондықтан адамдарды шынайы өмірде де, интернет кеңістігінде де жүйелі түрде қудалауға жол бермеуіміз керек. Елімізде сталкингке қатысты арнайы заң қабылданғаны – құптарлық дүние, – дейді Сырдария аудандық полиция бөлімінің отбасылық-тұрмыстық зорлық-зомбылыққа қарсы күрес тобының инспекторы, полиция аға лейтенанты Айгүл Рысымова.