Аймақ дамуына қажетті иннова­ция­лық идеяларды қолдау, ІТ бағы­тына қызығушы жастардың жобаларын қаржыландыруға мүмкіндік беру мақсатын көздеген іс-шарада жаңа есім­дер анықталды.

Фестивальдің салтанатты ашылу рәсімінде облыс әкімі аппаратының басшысы Әділхан Мұхамедияров қа­тысу­шыларды фестивальдің ашылуымен құттықтады.

– Ел Президенті Қасым-Жомарт Кемелұлы Тоқаев: «Бізге жасанды интеллект технологиясын дамытатын, оны күнделікті өмірге енгізе алатын ма­ман­дардың жаңа буыны қажет. Жас­тар ІТ саласын, стартап мәдениетін, жасанды интеллект пен Big Data технологиясын меңгерсе, Қазақстанның болашағы мықты болады» деп, ал­дағы үш жылда еліміздің цифрлы мем­лекетке айналуы керектігін атап өтті. Қызылорда экожүйесі дамыған, цифрлы мүмкіндіктері бар жаңа заман­ның жаңғырған қаласы ретінде жасанды интеллект жобаларын батыл енгізетін аймақтардың бірі болуы керек. Бұл бағытта цифрлық технологияларды дамытуға әрдайым қолдау көрсетіліп келеді. Шын мәнінде, InnoFest – мүмкіндіктер алаңы. Бүгін де араларыңыздан жасанды интеллектті жаңа деңгейге көтеретін, қазақстандық нейрожүйе жасайтын жас ғалымдар мен инноваторлар шығады деп сенеміз. Сондықтан өз идея­ларыңызды нақты өнімге айналдырудан қорықпаңыздар! Біз сіздерді әрдайым қолдаймыз! Қатысушыларға сәттілік тілеймін!, – деді Әділхан Мерекеұлы.

Биылғы жобаның жүлде қоры 5 400 000 теңгені құрады. Әр секциядан үздік шыққан жастарға Халықаралық ІТ, Астана ІТ, Қорқыт Ата, «Болашақ» және Ашық университеттерінің оқу гранттары, фестиваль серіктестерінен бағалы сыйлықтар табысталды.

Шабыт пен жаңашылдық мере­кесіне өзінің идеясы мен ұшқыр ойын ауданның №37 мектеп-лицейінің оқу­шылары ұсынып, үздіктер қатары­нан көрінді. Бойындағы талантын өнермен, біліммен ұштастырған, инно­вациялық жобасымен көзге түскен осы мектеп-лицейдің 7-сынып оқушысы Нұрислам Айбекұлы бірінші орын алып, 1000000 теңге сыйлық иесі атанды. Сондай-ақ осы мектеп-лицейдің оқушылары Інжу Амангелдиева екінші орын ал­ғаны үшін 500000 теңге, Ақан Әділхан мен Асылхан Әділхан 300000 теңге ақшалай сыйлыққа ие болды. Байқауда ерекше жобасымен көзге түскен 5 сынып оқушысы Айару Сәбит және 2 сынып оқушысы Айсезім Сәбит шығармашылық ізденісімен көптің ықы­ласына бөленді.

Бұл жетістік оқушылардың еңбегі ғана емес, оларға бағыт-бағдар беріп, әр қадамда демеу болған ұстаздары – информатика пәні мұғалімдері Гүлзат Ыбрайым мен Айнұр Нұрланова, тарих пәні мұғалімі Күлайша Асқарова және математика пәні мұғалімі Мирамкүл Молдажарованың табанды еңбегінің жемісі. Жобаны үздік қорғаған оқушы­лар еңбек пен табандылықтың, ұм­тылыс пен үздіксіз дамудың нәти­жесін көрсетті. «Әр қадам – жаңа тәжірибе, әр жетістік – жаңа мақсатқа жол» ұстаныммен биік белесті бағын­дырған сырдариялық шәкірттерді шын жүректен құттықтаймыз.