Негізінен, өңірімізден Абай облысына 52 ардагер арнайы іссапармен барған. Оларды Семей қаласы әкімінің орынбасары Қуаныш Әбілбаев қарсы алған. Сыр өңірінен келген зиялы қауым өкілдері арнайы жатақханаға ор­на­ласып, Семей қаласының көрікті жерлерін аралаған.

– Қазақта «Жақсыны көрмек үшін» деген мақал бар. Күннен-күнге өсіп-өр­кендеп келе жатқан Абай облысына іссапарымыз өте сәтті болды. Ауданнан бірнеше ардагер делегация құрамына кірдік. Ең алдымен, қаланың тыныс-тіршілігіне көз жүгіртіп, сәу­леті келіскен ғимарат жұмысымен таныс­тық. Ұлы ақынның, Мұхтар Әуезовтің және Алаш арыстарының мұражайын, Тынымбай Қаукенов атындағы мешітті көріп, тарихи құнды жәдігерлердің, бұйым­дардың осы кезге дейін сақ­талуына аса мән бердік. Даңқты палуан Қажымұқан Мұңайтпасұлы көтеріп әкелген 300 келілік тасты қолымызбен ұстап көрген едік. Абай Құнанбайұлының тұтынған заттарының жасалу жолын білдік. Бұдан бөлек, Қызылорда облысының концертін тамашалап, өнерге деген құрметтің ерекше еке­нін өңір жұртшылығының ыстық ықыласынан байқадық. Абай облы­сының әкімі Берік Уәли арнайы қонақ­асы берген еді. Сонда ән айтқан Мариям Жагорқызының немересімен танысуға мүмкіндік алдым, – дейді Алтын Нұртаева.

Сапар кезінде Сыр өңірінен кел­ген делегация «Еңлік-Кебек» кесе­несіне, Абай мен Шәкәрімнің мазарына, Зере мен Ұлжанның зия­ратына барып, марқұмдардың рухына Құран бағыштады. «Жидебай-Бөрілі» мемлекеттік тарихи-мәдени ме­мориалдық музейін аралап көрді.

– Екі өңірдің арасындағы берік байланысты көріп, ерекше қуандым. Мәдени-тарихи орындарды аралап жүріп, ұлылардың туған жерінің қасиетті екеніне көз жеткіздік. Абай облысына тарту ретінде қызылор­далықтар «Анаға тағзым» орталығын салу­ға уағдаласты. Ұлы ақынның 180 жылдық мерейтойы аясында талай қызықты дүниеге қанықтық. Мән-мағы­насы терең сапардың жанымызға рухани байлық сыйлағанын анық се­зіндік, – дейді ардагер-ұстаз.