Кірпіш зауыты құрылыстағы басты қажеттілікті өтейді

Кәсіпкерлік пен бизнес саласында өз ісін ашып, тәуекел ететін жандар қатары аз. Кез келген кәсіпке ең алдымен инвестиция құйылады. Табысты еселеу жолында сауаттылық пен істі жүргізе білу қабілеті өзіндік маңыздылығын жоймайды. Бүгінде Аманкелді кірпіш зауытына жетекшілік ететін Руслан Қаскиевпен өткен жылы танысқан едік. Үнемі ізденіс үстінде жүретін азаматтың күнделікті атқарып жатқан жұмысы орасан. Облыс жұртшылығын күйдірілген кірпішпен қамтамасыз ететін Руслан Жаңайдарұлы нарықта кәсіп көзін жетілдіруге күш салып келеді.

Сату стратегиясын құрып, мақсатты аудиторияны айқындап, кіріс пен шығысты баланста ұстайтын «АКЗ LTD» ЖШС басшысы Руслан Жаңайдарұлы күйдірілген кірпіш зауытын ауқымды түрде жүргізуде. Кірпіш өндіруде бірнеше технологияны қолданатын зауыттың әрбір маманы өз ісінің білгірі саналады. Аптап ыстыққа қармастан, күйдірілген кірпішті өндіріске жіберетін олар «Кәсіп жоқ жерде – нәсіп жоқ» екенін жақсы ұғады.

– Біз Аманкелді кірпіш зауытының жұмысын 2013 жылдан бері жүргізіп келеміз. Жылына 4 миллионға жуық кірпіш өндіріп, өңірімізге қарасты Қызылорда қаласы мен жекелеген аудандарға күйдірілген кірпішті сатып келеміз. Тек өзіміздің тарапымыздан облыс орталығына тасымалдау қызметін қарастырамыз. Кез келген бизнес идеядан басталады. Идея пайдалы, шешімге бағытталған, нарыққа қажетті болуы керек. Табысты бизнес – адамдардың күнделікті мәселесін шешетін кәсіпке айналғаны жөн. Бизнес жолында қателік болады. Бұл – қалыпты нәрсе. Қателік жасасаң – үйренесің, өсесің, жақсарасың. Ең бастысы – тоқтап қалмау деп білемін. Кәсіпкер ретінде қоғамға пайда әкелгеніміз жақсы. Сапалы өнім ұсына отырып, сұраныс көлемін арттыра алған жақсы. Қазіргі уақытта зауытта 20 адам жұмыс жасауда, – дейді Руслан Жаңайдарұлы.

«АКЗ LTD» ЖШС директорының орын­басары Арслан Абдиев зауыт жұмысын таныстыру барысында кір­піштің жасалу технологиясын таныстырды. Расында, кірпішті өндіру барысында керекті шикізат құм екені белгілі. Зауыт басшылығы арнайы карьердің аумағын кеңейтіп, құжатын рәсімдеген. Заңды түрде табиғи құрылыс материалын дайындауға қажетті құмды белгіленген жерден тасымалдайды.

– Зауыт мамандары өндірісте кірпіш қана шығарып қоймайды. Бизнес болғандықтан құжат айналымын тиімді әрі ұтымды жүргізу міндеті тұр. Мақсатты түрде серіктестермен келісім-шартқа отырып, өзімізден шығатын өнімді сатумен айналысамыз. Кәсіби тұрғыдан біліктілік жетілдіріп, заман көшіне ілесуді мақсат тұтамыз. Әрине, еңбек ете отырып, зауыттың немесе өнімнің нарықтағы бейнесі – табысы мол бренд саналады. Брендті табысқа айналдыру жолында нарықтағы бизнес тетіктерін зерттейміз, – деді Арслан Абдиев.

Аманкелді ауылына сапар барысында кірпіш зауытының тоқтаусыз жүріп жатқан жұмысын көзіміз көрді. Әдеттегідей зауыт қызметкерлері карьерден құм әкеліп, арнайы станоктың көмегіне жүгінеді. Станоктан дайын болып шыққан кірпіш 20 күн бойы кептіріледі. Бұдан кейін 800-900 градуста жанып тұрған пешке орналас­тырылады. Пеште 10 күнге жуық тұра­тын күйдірілген кірпіш құрылыста пайдалануға дайын болады. Айта кетейік, арнайы стандартқа сай кірпіштің көлемі бойынша ұзындығы 250 мм, ені 120 мм, биіктігі 88 мм болады.

                                         

Аманкелді ауылының жергілікті халқы көбіне кесек басумен айналысып, табыс көлемін арттырады. Руслан Жаңайдарұлы елді мекендегі тұрмысы төмен отбасыларға азық-түлікпен қамтамасыз етіп, өз көмегін көрсетуде. Ауыл ақсақалдарымен бірлесіп, егістік көлемін арттыруға күш салып келеді. Өткен жылдың соңында аудандық мәслихат депутаты ретінде сайланған зауыт басшысы ауылдағы мәдени-көпшілік іс-шараның көптеп өткізілуіне демеушілік жасауда. Мәселен, биыл 10 балаға мектепке қажетті құрал-жабдық алып беріп, олардың жаңа оқу жылына дайындығын пысықтады.

– Аманкелді ауылына келген көпшілік жол бойында орналасқан үйлердің есік алдынан кесек құйып жатырған еңбекқор жандарды кезік­тіреді. Бұрыннан келе жатқан үрдіс бойынша кесек құйып, сатылымға шығаратын ағайынның еңбегі өлшеусіз. Аманкелді кірпіш зауыты сұраныс көлемін арттырып, бизнес саласындағы өзіндік позициясын қалыптастыра біл­ді. Осы күні зауыт басшылығымен тығыз қарым-қатынас орнатып, ха­лық­тың әлеуметтік жағдайын жақ­сартуға күш салып келеміз. Руслан Жаңайдарұлы аудандық мәслихат депутаты ретінде келелі істердің басы-қасынан табылуда, – деді ауыл әкімі Зейнұр Жаманқұлов.

Зауыт жұмысын ширатқан Бағлан

Тоғыз жылдан бері кірпіш зауытта қызмет етіп келе жатқан Бағлан Мұқанов өз ісімен дараланған азамат. Жалағаш ауданының тумасы. Бағлан­ның негізгі мамандығы – логис­тика саласы. Алғаш кірпіш зауытқа келген сала маманына жауапты жұмыс тапсырылады. Білікті маман кір­піш­тің санын ала отырып, пешке орнасуына бақылау жүргізген болатын. Қазіргі уақытта Бағлан Мұқанов тұтыну­шылармен байланыс қызметін үйлестіреді.

– Бізде бір кірпіштің бағасы 55-60 теңгені құрайды. Арасында тұрақты тұтынушыларға жеңілдік жасап тұра­мыз. Сапалы өнім шығарып, жер­гілікті халыққа ұсыну басты қағида саналады. Өндіріс базасында қазір барлық жағдай жасалған. Қауіпсіздік іс-шарасын басты назарда ұстап, кір­піш шығару технологиясына аса мән береміз, – деді сала маманы.

Мекеменің қарауылы Сәбит Рахметов зауыт аумағын жасыл желекке айналдырған. Жеміс ағашымен қатар бірнеше талды еккен ардақты азамат жаз маусымында тыным таппайды. Алдағы уақытта талдардың санын көбейтіп, көркейту-көгалдандыруға кө­ңіл бөліне бермек.

Балтабай ОРДАБЕКОВ